آج ملک پر سلیکٹیڈ اور آمر کا راج ہے: بلاول بھٹو زرداری

اسلام کوٹ (ڈیلی اردو) چیئرمین پیپلز پارٹی بلاول بھٹو زرداری نے کہا ہے کہ حکومت نے ملک کا ستیا ناس کردیا ہے، ہمیں کٹھ پتلی حکومت سے جان چھڑانا ہوگی، کٹھ پتلی حکومت نے کشمیر کا سودا کرلیا ہے، سفید پوش طبقے کا معاشی قتل کیا جا رہا ہے، عمران خان ظالم اور سندھ دشمن ہے، کٹھ پتلی کی حکومت گرا کر عوامی حکومت بنا کر رہیں گے، عمران خان کی حکومت گرانے نکلا ہوں۔

ضلع تھرپارکر کے علاقے اسلام کوٹ میں عوامی اجتماع سے خطاب کرتے ہوئے بلاول بھٹو زرداری نے کہا کہ شہید ذوالفقار علی بھٹو نے عوام کو طاقت کا سرچشمہ بنایا، بھٹو نے ہاریوں کو زمینیں دیں، ملک کیلئے جدوجہد کی اور ملک کو آئین دیا۔

انہوں نے کہا کہ تھر محبت، امن اور مہمان نوازوں کا شہر ہے، بے نظیر نے عوام کی خاطر شہادت قبول کی، بے نظیر نے دہشت گردوں کی آنکھوں میں آنکھیں ڈال کر ان کو للکارا۔

انہوں نے کہا کہ تھر والوں نے انگریز کے خلاف بغاوت کی، میں ان بہادر لوگوں کے پاس آیا ہوں۔ آج پر پھر صوبوں کے حقوق چھینے جارہے ہیں اور صوبے کواس کاحصہ نہیں دیا جارہا۔ آج ملک پر آمر، ظالم اور کٹھ پتلی اور سلیکٹیڈ حکومت کا راج ہے، نوجوانوں کو روز گا رنہ دیکر ان کا معاشی قتل عام کیا جارہا ہے، تنخواہوں اور پنشن میں اضافہ نہ کرکے سفید پوش طبقے کا معاشی قتل کیا جارہا ہے۔ سندھ کے حقوق چھینے جارہے ہیں، عوام کے معاشی حقوق سلب کئے جارہے ہیں، سندھ کا پانی چوری کیا جا رہا ہے، اب یہ لوگ کراچی چھیننا چاہتے ہیں۔