اسرائیلی وزیراعظم کا سخت پیغام: “فلسطینی ریاست کا قیام دہشتگردی کو نوازنا ہے”

نیویارک + تل ابیب (نمائندہ ڈیلی اردو) اسرائیلی وزیراعظم بنجامن نیتن یاہو نے واضح طور پر اعلان کیا ہے کہ دریائے اردن کے مغرب میں فلسطینی ریاست قائم نہیں ہو گی۔ یہ بیان کینیڈا، آسٹریلیا اور برطانیہ کی جانب سے فلسطین کو خودمختار ریاست تسلیم کرنے کے اعلان کے بعد سامنے آیا ہے۔

نیتن یاہو نے ایک ویڈیو پیغام میں کہا کہ  “سات اکتوبر کے قتل عام کے بعد فلسطینی ریاست کو تسلیم کرنے والے رہنماؤں کو میں واضح پیغام دینا چاہتا ہوں کہ آپ دہشتگردی کا بہت بڑا انعام دے رہے ہیں۔ اور میرا آپ کے لیے ایک اور پیغام ہے کہ ایسا نہیں ہو گا۔”

انہوں نے مزید کہا کہ “برسوں سے ہم نے اس دہشت گرد ریاست کے قیام کو روکا ہے اور ہمارے ملک کے دل میں اس دہشتگرد ریاست کو مسلط کرنے کی تازہ ترین کوشش کا جواب میں امریکہ سے واپسی پر دوں گا، جہاں اس ہفتے میں نیویارک میں اقوام متحدہ کی جنرل اسمبلی میں شرکت کر رہا ہوں۔”

اسرائیلی وزارت خارجہ نے بھی فلسطینی ریاست کو تسلیم کرنے کے اقدام پر کڑی تنقید کی اور اسے "جہادی حماس کو نوازنے کے سوا کچھ نہیں" قرار دیا۔ وزارت خارجہ نے ایکس پر پوسٹ کرتے ہوئے کہا کہ: “حماس کے رہنما خود کھل کر اعتراف کرتے ہیں کہ فلسطین کی ریاست کو تسلیم کرنا سات اکتوبر کے قتل عام کا براہ راست نتیجہ اور 'پھل' ہے۔”

سات اکتوبر کو حماس کے ہاتھوں یرغمال بننے والے سابق برطانوی-اسرائیلی ایملی داماری کی والدہ مینڈی دماری نے برطانیہ کے وزیر کار اسٹارمر کے دو ریاستی حل کے مؤقف پر تنقید کی اور کہا کہ ان کی حکومت "دو ریاستی دھوکے کا شکار ہے"۔

یہ پیش رفت اسرائیل اور فلسطین کے درمیان کشیدہ حالات کو مزید بڑھا سکتی ہے، کیونکہ مغربی ممالک کی جانب سے فلسطین کو خودمختار ریاست تسلیم کرنے کا عمل خطے میں موجود سیاسی تناؤ میں اضافہ کا باعث بن رہا ہے۔