افریقی ملک برکینا فاسو میں دہشت گردوں کا حملہ، 114 عام شہری ہلاک

واگادوگو (ڈیلی اردو) افریقی ملک برکینا فاسو میں رات گئے دہشت گردوں کے حملے میں 114 عام شہری ہلاک ہوگئے۔

برکینا فاسو نیوز ایجنسی اے آئی بی کی خبر کے مطابق دہشت گردوں نے رات کے وقت دیہاتیوں پر فائرنگ شروع کردی۔ حملہ آوروں نے مقامی لوگوں کے مکانات اور مارکیٹ کو بھی آگ لگا دی۔

اس دہشتگرد حملے میں 114 سے زائد افراد ہلاک ہوگئے ہیں اور خدشہ ظاہر کیا جارہا ہے کہ ہلاکتوں کی تعداد میں اضافہ ہو سکتا ہے۔ حملہ آوروں نے گاؤں کے درجنوں گھروں کو آگ لگا کر خاکستر کردیا۔

سیکیورٹی حکام کے مطابق دہشتگردانہ حملے میں ہلاک ہونے والوں میں خواتین بھی شامل ہیں، برکینا فاسو کی حکومت نے سانحے پر 3 روزہ سوگ کا اعلان کیا ہے۔

2015 کے بعد سے، برکینا فاسو کو دہشت گردی کے حملوں سے سکیورٹی کی بگڑتی ہوئی صورتحال کا سامنا ہے جس میں ہزاروں افراد ہلاک اور 10 لاکھ سے زیادہ بے گھر ہوئے۔