افریقی ملک کانگو میں ایک ماہ کے دوران ’1500 سے زائد عام شہری‘ ہلاک

کنشاسا (ڈیلی اردو/ اے ایف پی) افریقی ملک ڈیموکریٹک ریپبلک کانگو کی طرف سے نئے سال 2026ء کے آغاز پر بتایا گیا ہے کہ کانگو کے مشرق میں صرف گزشتہ ماہ دسمبر میں ہی روانڈا کی ایک ملیشیا کے ہاتھوں ’ڈیڑھ ہزار سے زائد عام شہری‘ مارے گئے۔

کنشاسا سے ملنے والی رپورٹوں کے مطابق یہ  1,500 سے زائد سویلین باشندے اس وقت ہلاک کر دیے گئے، جب دسمبر میں کیگالی کی حمایت یافتہ M23 نامی ملیشیا نے مسلح خونریزی کی نئی لہر شروع کر دی۔

نیوز ایجنسی اے ایف پی نے کنشاسا حکومت کی طرف سے جاری کردہ ایک بیان کا حوالہ دیتے ہوئے لکھا ہے کہ یہ نئی ہلاکتیں دسمبر کے اوائل میں شروع ہوئیں جو گزشتہ ماہ کے آخر تک جاری رہیں۔

کنشاسا حکومت کے بیان کے مطابق، ’’کانگو اور روانڈ کی حکومتوں کے مابین امریکہ کی ثالثی میں طے پانے والے امن معاہدے پر دستخطوں کے محض چند روز بعد چار دسمبر کو ایم 23 نامی ملیشیا نے اُوویرا نامی شہر پر قبضہ کر کے وہاں خونریزی شروع کر دی تھی۔‘‘

نسل کُشی دراصل ہے کیا؟

بیان کے مطابق اس شہر پر قبضے کے بعد وہاں سے ہزارہا عام شہری سرحد پار کر کے ہمسایہ ملک برونڈی میں پناہ لینے پر مجبور ہو گئے، جبکہ اس ملیشیا کے ہاتھوں گزشتہ ماہ ہلاک ہونے والے کانگو کے عام شہریوں کی تعداد کل بدھ کے روز تک 1,500 سے تجاوز کر چکی تھی۔