افغانستان: طالبان کا افغان ہیلی کاپٹر مار گرانے کا دعویٰ

کابل (بیورو رپورٹ) افغانستان میں افغان فضائیہ کا ہیلی کاپٹر گرنے سے تین سکیورٹی اہلکار ہلاک ہوگئے۔

تفصیلات کے مطابق افغانستان کے صوبے میدان وردک کے ضلع جغاتو میں افغان ایئر فورس کا ہیلی کاپٹر ایم آئی-17 گر کر تباہ ہونے سے 3 اہلکار ہلاک اور ایک شدید زخمی ہوگیا۔ ہلاک اور زخمی ہونے والوں کی شناخت ظاہر نہیں کی گئی۔

افغان وزارت دفاع کی جانب سے جاری بیان میں کہا گیا ہے کہ ہیلی کاپٹر حادثہ تیکنیکی خرابی کے باعث پیش آیا۔ زخمی اہلکار کو ہسپتال منتقل کردیا گیا جہاں اس کی حالت نازک بتائی جا رہی ہے۔

وزارت دفاع کا بتانا ہے کہ ہیلی کاپٹر کو زخمی سکیورٹی ممبران کی منتقلی کے لیے اس علاقے میں بھیجا گیا تھا۔

دوسری جانب طالبان نے دعویٰ کیا ہے کہ ہیلی کاپٹر حادثے کا شکار نہیں ہوا بلکہ انہوں نے اس کو نشانہ بنایا تاہم سرکاری حکام کی جانب سے طالبان کے دعوے کی تصدیق یا تردید نہیں کی گئی ہے۔

https://twitter.com/Zabehulah_M33/status/1402509783723393024?s=19