افغانستان: مزار شریف میں مسجد کے باہر دھماکہ، ایک شخص ہلاک، تین زخمی

کابل (بیورو رپورٹ) افغانستان کے شمالی صوبہ بلخ کے دارالحکومت مزار شریف میں ایک مسجد کے باہر دھماکہ ہوا ہے۔ افغان اخبار اطلاعات روز نے عینی شاہدین کے حوالے سے بتایا ہے کہ دھماکے کے نتیجے میں کم از کم ایک شخص ہلاک جبکہ تین افراد زخمی ہوئے ہیں۔

ابتدائی اطلاعات کے مطابق دھماکہ پہلے سے نصب شدہ بارودی مواد کے ذریعے کیا گیا۔ یہ دھماکہ نماز کے وقت مسجد کے باہر ہوا، جس کے بعد علاقے میں خوف و ہراس پھیل گیا۔

تاحال طالبان حکومت نے اس واقعے پر کوئی ردعمل ظاہر نہیں کیا ہے۔

یاد رہے کہ اسی مسجد کو 2022 میں بھی ایک خودکش حملے کا نشانہ بنایا گیا تھا، جس میں درجنوں افراد ہلاک اور زخمی ہوئے تھے۔ حالیہ دھماکے نے ایک بار پھر مقامی افراد کو شدید تشویش میں مبتلا کر دیا ہے۔