افغان طالبان کا وفد 3 روزہ دورے پر پاکستان پہنچ گیا

اسلام آباد (ڈیلی اردو) افغانستان میں امن عمل کی کامیابی اور امریکہ طالبان معاہدہ بحال رکھنے کی کوششوں کے سلسلہ میں افغان وفد اپنے 3 روزہ سفارتی دورہ پر پاکستان پہنچے ہیں۔

تفصیلات کے مطابق افغان صدر کے نمائندہ خصوصی عمر داودزی وفد کے ہمراہ پاکستان کے 3 روزہ دورے پر بدھ کو پاکستان پہنچے جہاں انہوں نے اپنے پاکستانی ہم منصب محمد صادق کے ساتھ افغان عمل سے متعلق تفصیلی بات چیت کی۔

ذرائع کے مطابق افغان امن عمل سے متعلق گروپ کا پہلہ اجلاس بدھ کی شام کو اسلام آباد میں ہوا جس میں امن عمل میں پاکستان کے تعاون پر گفتگو ہوئی۔

ذرائع کا بتانا ہے افغان وفد نے امن عمل میں پاکستان کے کردار کی اہمیت کا ذکر کرتے ہوئے درخواست کی کہ پاکستان امن عمل کی کامیابی کیلئے افغانستان کی مدد کرِیں۔

واضح رہے کہ وزیر اعظم عمران خان کے دورہ کابل کے دوران امن عمل اور سکیورٹی شعبہ میں تعاون کیلئے دو گروپس بنانے پر اتفاق کیا گیا تھا۔

افغان وفد وزیر خارجہ شاہ محمودقریشی اور اسپیکر قومی اسمبلی اسد قیصر سے بھی ملاقاتیں کرینگے۔

افغان نمائندے کا دورہ پاکستان عین اس وقت ہو رہا ہے جب دوحہ میں افغان حکام کے ایک ماہ کے تعطل کے بعد طالبان کے ساتھ مذاکرات دوبارہ شروع ہوئے ہیں،عمر داودزی کے دورے کا بنیادی مقصد امن عمل کو سبوثاژ ہونے سے بچانا ہے۔