الخلیل میں فوجی چوکی پر فائرنگ، دو فلسطینی ہلاک، پانچ اسرائیلی زخمی؛ نیتن یاہو کا شہر کی ناکہ بندی اور مغربی کنارے کی بندش کی تیاری کا حکم

الخلیل (ڈیلی اردو) اسرائیل کے زیر قبضہ مغربی کنارے کے شہر الخلیل میں فوجی چوکی کے قریب فائرنگ کے واقعے کے بعد اسرائیلی فوج نے دو فلسطینیوں کو ہلاک کرنے کا دعویٰ کیا ہے، جبکہ واقعے میں کم از کم پانچ اسرائیلی زخمی ہوئے، جن میں دو کی حالت تشویش ناک بتائی گئی ہے۔ واقعے کے بعد اسرائیلی وزیرِ اعظم بنیامین نیتن یاہو نے شہر کی ناکہ بندی اور مغربی کنارے میں مزید سکیورٹی پابندیوں کی تیاری کا حکم دے دیا۔

خبر رساں ادارے ایسوسی ایٹڈ پریس (اے پی) اور برطانوی خبر رساں ادارے رائٹرز کے مطابق فائرنگ کا واقعہ جمعے کی صبح الخلیل کے قریب یہودا جنکشن کے علاقے میں پیش آیا، جہاں اسرائیلی فوج نے ایک عارضی چوکی قائم کر رکھی تھی۔ اسرائیلی حکام کے مطابق دو مسلح فلسطینیوں نے چوکی پر فائرنگ کی، جس کے بعد فریقین کے درمیان تقریباً 20 منٹ تک فائرنگ کا تبادلہ جاری رہا۔ اسرائیلی فوج نے بعد ازاں دونوں فلسطینیوں کو ہلاک کرنے کا اعلان کیا۔

اسرائیلی فوج کے مطابق دونوں افراد کے پاس ایم 16 رائفل اور ایک پستول تھا۔ فوج نے دعویٰ کیا کہ ابتدائی تحقیقات اور گاڑی سے ملنے والے اسلحے اور بڑی مقدار میں گولہ بارود سے ظاہر ہوتا ہے کہ مشتبہ افراد کسی بڑے حملے کی تیاری کر رہے تھے۔ تاہم حملے کے مبینہ منصوبے سے متعلق اسرائیلی حکام کے دعوؤں کی آزادانہ تصدیق سامنے نہیں آئی۔

واقعے کے بعد اسرائیلی فوج نے الخلیل شہر کے داخلی اور خارجی راستوں پر پابندیاں عائد کردیں اور قریبی فلسطینی دیہات میں ناکے قائم کرکے تلاشی کی کارروائیاں شروع کردیں۔ نیتن یاہو کے دفتر کے مطابق وزیرِ اعظم نے سکیورٹی حکام سے مشاورت کے بعد الخلیل کو گھیرے میں لینے اور پورے مغربی کنارے کی ممکنہ بندش کے لیے تیاری کرنے کی ہدایت کی۔ اس اقدام سے علاقے میں فلسطینی شہریوں کی نقل و حرکت مزید متاثر ہونے کا خدشہ ہے۔

نیتن یاہو نے واقعے کا الزام حماس پر عائد کرتے ہوئے دعویٰ کیا کہ تنظیم ایک بڑے حملے کی منصوبہ بندی کر رہی تھی۔ انہوں نے فوج اور سکیورٹی اداروں کو ہدایت کی کہ مبینہ حملوں کی روک تھام کے لیے اضافی اقدامات کیے جائیں۔ دوسری جانب امریکی اخبار واشنگٹن پوسٹ کی رپورٹ کے مطابق حماس نے فائرنگ کے واقعے کی ذمہ داری قبول کرنے کا اعلان کیا اور اسے فلسطینی علاقوں میں اسرائیلی کارروائیوں کے ردعمل سے جوڑا۔ تاہم بعض ابتدائی رپورٹس میں حماس کی جانب سے ذمہ داری قبول کرنے کی تصدیق نہیں کی گئی تھی۔

یہ واقعہ ایسے وقت میں پیش آیا ہے جب مقبوضہ مغربی کنارے میں اسرائیلی فوجی کارروائیوں، فلسطینیوں کی نقل و حرکت پر پابندیوں اور آبادکاروں کے حملوں کے باعث کشیدگی برقرار ہے۔ عالمی میڈیا کے مطابق الخلیل اور اس کے گردونواح میں نئی ناکہ بندیوں اور سکیورٹی کارروائیوں کے نتیجے میں مقامی آبادی کی آمدورفت اور روزمرہ زندگی مزید متاثر ہوسکتی ہے۔