امریکا: الیکشن پر دہشت گرد حملے کی سازش، افغان شہری کو 15 سال قید

واشنگٹن (نمائندہ ڈیلی اردو) امریکا میں الیکشن ڈے پر دہشت گرد حملے کی سازش میں ملوث افغان شہری کو 15 سال قید کی سزا سنا دی گئی ہے۔

عدالتی دستاویزات کے مطابق عبداللہ حاجی زادہ کے پاس امریکی گرین کارڈ موجود تھا اور اس نے داعش کی جانب سے سازش کرتے ہوئے دو اے کے 47 طرز کی رائفلیں اور 500 راؤنڈ گولہ بارود حاصل کرنے کی کوشش کی، جبکہ اسے علم تھا کہ یہ اسلحہ 2024 کے الیکشن ڈے پر پرتشدد حملے کے لیے استعمال ہونا تھا۔

اس کیس کی تفتیش آئی سی ای ہوم لینڈ سیکیورٹی انویسٹی گیشنز (HSI) کے خصوصی ایجنٹس نے شروع کی، جنہوں نے سرچ وارنٹس پر عمل درآمد کیا اور گرفتاریاں عمل میں لائیں۔

حکام کے مطابق سزا مکمل ہونے کے بعد آئی سی ای انفورسمنٹ اینڈ ریموول آپریشنز (ERO) کے افسران عبداللہ حاجی زادہ کو افغانستان ڈی پورٹ کر دیں گے۔