امریکہ، پاکستان انسداد دہشتگردی ڈائیلاگ: بی ایل اے، ٹی ٹی پی اور داعش سے نمٹنے پر اتفاق

واشنگٹن (ش ح ط) پاکستان کے وفاقی دارالحکومت اسلام آباد میں 12 اگست 2025 کو امریکہ اور پاکستان کے درمیان انسداد دہشت گردی ڈائیلاگ کا تازہ ترین دور منعقد ہوا، جس میں دونوں ممالک نے دہشت گردی سے نمٹنے کے عزم کا اعادہ کیا۔

امریکی محکمہ خارجہ کے اعلامیے کے مطابق، فریقین نے بلوچستان لبریشن آرمی (بی ایل اے)، مجید بریگیڈ، داعش خراسان اور تحریک طالبان پاکستان (ٹی ٹی پی) کے خطرات کے خلاف مؤثر حکمت عملی اپنانے پر زور دیا۔ اجلاس کی مشترکہ صدارت پاکستان کے خصوصی سیکرٹری نبیل منیر اور امریکی قائم مقام کوآرڈینیٹر گریگوری ڈی لوگرفو نے کی۔

امریکہ نے پاکستان کی انسداد دہشت گردی کامیابیوں کو سراہا اور بلوچستان میں جعفر ایکسپریس پر حملے اور خضدار میں سکول بس دھماکے میں ہلاکتوں پر تعزیت کی۔ اعلامیے میں کہا گیا کہ دونوں ممالک دہشت گردی میں نئی ٹیکنالوجیز کے استعمال کے تدارک اور ادارہ جاتی صلاحیتوں کو مضبوط بنانے پر کام کریں گے۔

یاد رہے، امریکہ نے پیر کو بی ایل اے اور اس کے مجید بریگیڈ کو غیر ملکی دہشت گرد تنظیم قرار دیا ہے۔ محکمہ خارجہ کے مطابق، 2024 میں بی ایل اے نے کراچی اور گوادر میں خودکش حملے کیے، جبکہ مارچ 2025 میں جعفر ایکسپریس ہائی جیکنگ میں 31 افراد کو ہلاک اور 300 سے زائد کو یرغمال بنایا۔