امریکہ میں پاکستان کے آرمی چیف فیلڈ مارشل سید عاصم منیر کی اعلیٰ سطحی ملاقاتیں

واشنگٹن +اسلام آباد  (ڈیلی اردو) پاکستان کے آرمی چیف فیلڈ مارشل سید عاصم منیر نے امریکہ کا سرکاری دورہ کیا، جہاں انہوں نے اعلیٰ سیاسی و عسکری قیادت سے ملاقاتیں کیں۔

آئی ایس پی آر کے مطابق فیلڈ مارشل نے ٹمپا میں سینیٹ کام کمانڈر کی تبدیلی کمانڈ کی تقریب میں شرکت کی اور دوطرفہ فوجی تعاون کے فروغ میں جنرل مائیکل کوریلا کے کردار کو سراہا۔

دورے کے دوران فیلڈ مارشل نے چیئرمین جوائنٹ چیفس آف اسٹاف جنرل ڈین کین سے ملاقات کی، جس میں پیشہ ورانہ امور پر تبادلہ خیال کیا گیا۔ انہوں نے جنرل ڈین کین کو پاکستان کے دورے کی دعوت بھی دی۔

اس کے علاوہ فیلڈ مارشل کی دوست ممالک کے چیف آف ڈیفینس سے بھی ملاقاتیں ہوئیں، جن میں مشترکہ سکیورٹی چیلنجز سے نمٹنے کے لیے مسلسل تعاون کے عزم کا اعادہ کیا گیا۔

فیلڈ مارشل سید عاصم منیر نے امریکہ میں مقیم پاکستانی کمیونٹی سے بھی ملاقاتیں کیں اور انہیں ملکی صورتحال سے آگاہ کیا۔

پاکستانی کمیونٹی سے خطاب

پاکستان کے آرمی چیف فیلڈ مارشل سید عاصم منیر نے دورۂ امریکا کے دوران پاکستانی کمیونٹی سے خطاب کرتے ہوئے کہا کہ امریکا میں مقیم پاکستانیوں سے مخاطب ہونا اُن کے لیے اعزاز کی بات ہے۔ انہوں نے کہا کہ بیرون ملک پاکستانی "برین ڈرین نہیں بلکہ برین گین" ہیں، جو عزت و وقار کا سرچشمہ اور دیگر پاکستانیوں کی طرح پرجوش ہیں۔

فیلڈ مارشل نے خطاب میں کہا کہ بھارت خود کو ’وشوا گرو‘ کے طور پر پیش کرنے کی کوشش کر رہا ہے لیکن حقیقت اس کے برعکس ہے۔ بھارتی خفیہ ایجنسی ’را‘ کی ٹرانس نیشنل دہشت گرد سرگرمیوں میں شمولیت عالمی سطح پر شدید تشویش کا باعث ہے، جس کی مثال کینیڈا میں سکھ رہنما کا قتل، قطر میں 8 بھارتی نیول افسران کا معاملہ اور کلبھوشن یادیو جیسے واقعات ہیں۔

ان کا کہنا تھا کہ پاکستان نے بھارت کی امتیازی اور دوغلی پالیسیوں کے خلاف کامیاب سفارتی جنگ لڑی ہے۔ حالیہ بھارتی جارحیت نے پاکستان کی خودمختاری کی سنگین خلاف ورزی کرتے ہوئے معصوم شہریوں کو شہید کیا اور خطے کو خطرناک تصادم کے دہانے پر لا کھڑا کیا۔ کسی بھی غلطی سے دو طرفہ جنگ بھڑک سکتی تھی۔

آرمی چیف نے کہا کہ پاکستان صدر ڈونلڈ ٹرمپ کا شکر گزار ہے، جن کی اسٹریٹجک قیادت نے نہ صرف انڈیا-پاکستان جنگ کو روکا بلکہ دنیا میں کئی دیگر تنازعات کو بھی ختم کرنے میں کردار ادا کیا۔ پاکستان نے بھارتی اشتعال انگیزی کا بھرپور جواب دیا اور بڑے تنازع کو روکنے میں کامیابی حاصل کی، تاہم بھارت خطے میں عدم استحکام پیدا کرنے پر بضد ہے۔

انہوں نے واضح کیا کہ پاکستان کسی بھی بھارتی جارحیت کا منہ توڑ جواب دے گا۔ مقبوضہ کشمیر بھارت کا اندرونی معاملہ نہیں بلکہ ایک نامکمل بین الاقوامی ایجنڈا ہے۔ قائداعظم کے مطابق کشمیر پاکستان کی ’شہ رگ‘ ہے اور اقوامِ متحدہ کی سلامتی کونسل کی قراردادیں اس موقف کی تائید کرتی ہیں۔

فیلڈ مارشل نے کہا کہ محض ڈیڑھ ماہ کے وقفے میں میرا دوسرا دورہ امریکا، پاک-امریکا تعلقات کے حوالے سے ایک نئی جہت کی علامت ہے۔ ان دوروں کا مقصد تعلقات کو تعمیری، پائیدار اور مثبت راستے پر گامزن کرنا ہے اور ممکنہ تجارتی معاہدے سے بھاری سرمایہ کاری متوقع ہے۔

انہوں نے کہا کہ غزہ میں جاری نسل کشی بدترین انسانی المیہ ہے، جس کے عالمی اور علاقائی اثرات خطرناک ہیں۔ افغانستان سے کئی دہشت گرد تنظیمیں، جن میں فتنہ الخوارج بھی شامل ہے، پاکستان کے خلاف سرگرم ہیں۔ پاکستان دہشت گردی کے خلاف آخری فصیل ہے، دہشت گردوں کو پوری قوت سے انصاف کے کٹہرے میں لایا جائے گا۔

فیلڈ مارشل کے مطابق بیرون ملک مقیم پاکستانی وطن سے گہری وابستگی رکھتے ہیں اور قدرتی آفات میں سب سے پہلے مدد کو پہنچتے ہیں۔ سوشل میڈیا ایک طاقتور ذریعہ ہے لیکن ملک دشمن عناصر اسے ساختہ افراتفری پھیلانے کے لیے استعمال کرتے ہیں، اس لیے خبروں کی تصدیق نہایت ضروری ہے۔

انہوں نے کہا کہ پاکستان کی 64 فیصد آبادی نوجوانوں پر مشتمل ہے جو بے پناہ صلاحیتوں سے مالا مال ہے اور مستقبل کی تعمیر میں کلیدی کردار ادا کرے گی۔ امریکا، سعودی عرب، یو اے ای اور چین کے ساتھ مختلف مفاہمتی یادداشتوں پر عمل درآمد جاری ہے، جو معاشی تعاون اور سرمایہ کاری کو فروغ دیں گے۔

خطاب کے اختتام پر فیلڈ مارشل نے کہا کہ بھارت کے خلاف حالیہ سفارتی و سکیورٹی کامیابیاں اللہ تعالیٰ کی رحمت، قوم کی اجتماعی کوشش، سیاسی قیادت کی بصیرت اور بہادر افواج کی پیشہ ورانہ مہارت کا نتیجہ ہیں۔ “اب سوال یہ نہیں کہ ہم کب اُٹھیں گے بلکہ یہ ہے کہ کتنی جلدی اور کتنی قوت سے ہم اٹھیں گے۔ آئیے اپنے آباؤ اجداد کی میراث کو قائم رکھتے ہوئے نئے جذبے اور مقصد کے ساتھ آگے بڑھیں۔”