امریکی حملوں میں جزیرہ خارگ پر تمام ایرانی فوجی اہداف تباہ، امریکی صدر ٹرمپ

واشنگٹن (ڈیلی اردو) امریکہ کے صدر ڈونلڈ ٹرمپ کا کہنا ہے کہ ’امریکی فوج کی سینٹرل کمانڈ (یو ایس سینٹکام) نے مشرق وسطیٰ کی تاریخ کے سب سے طاقتور بم حملوں میں سے ایک کو سر انجام دیا ہے اور ایران کے جزیرہ خارگ پر موجود تمام فوجی اہداف کو مکمل طور پر ختم کر دیا ہے۔‘

ٹروتھ سوشل پر جاری اپنے پیغام میں صدر ٹرمپ کا کہنا تھا کہ ’میں نے جزیرے پر تیل کے بنیادی ڈھانچے کو ختم نہ کرنے کا انتخاب کیا ہے۔ تاہم، اگر ایران، یا کسی اور نے، آبنائے ہرمز سے بحری جہازوں کے آزاد اور محفوظ نقل و حمل میں مداخلت کرنے کی کوشش کی تو میں فوری طور پر اس فیصلے پر نظر ثانی کروں گا۔‘

انھوں نے ایران سے مطالبہ کیا کہ وہ اپنے ہتھیار ڈال دیں اور ’ان کے ملک میں جو بچا ہے اسے بچا لیں، جو کہ کچھ زیادہ نہیں ہے۔‘

اس بیان سے کچھ ہی دیر قبل صدر ٹرمپ نے ایئر فورس ون میں سوار ہونے سے پہلے صحافیوں سے بات کی تھی۔ اس دوران جب ان سے پوچھا گیا کہ ان کے خیال میں یہ جنگ کب تک جاری رہے گی، تو ان کا کہنا تھا کہ ’یہ تو میں بھی آپ کو نہیں بتا سکتا۔‘

’میرا مطلب ہے، میرا اپنا ایک اندازہ ہے، لیکن اس سے کیا فرق پڑتا ہے؟‘ انھوں نے کہا. ’جب تک ضرورت ہو گی تب تک چلے گی، وہ ختم ہو چکے ہیں۔‘

جب ان سے پوچھا گیا کہ اس سے ان کی کیا مراد ہے تو ان کا کہنا تھا کہ ان کی بحریہ، فضائی اور فوج کا بیشتر حصہ تباہ ہو چکا ہے۔

یاد رہے کہ جمعرات کے روز ہی انھوں نے امریکہ کی جانب سے جزیرہ خارگ پر قبضے کے امکان کو مسترد کیا تھا۔

فاکس نیوز کو دیے گئے ایک انٹرویو میں جب ان سے پوچھا گیا کہ آیا ان کا اس جزیرے پر قبضہ کرنے کا کوئی ارادہ ہے تو ان کا کہنا تھا کہ یہ ہماری ترجیحات میں شامل نہیں۔

ایران کی ’تیل کی لائف لائن‘جزیرہ خارگ کہاں واقع ہے اور اس کیا اہمیت ہے؟

امریکہ کے صدر ڈونلڈ ٹرمپ نے دعویٰ کیا ہے کہ امریکہ نے ایران کے جزیرہ خارگ پر ’تمام فوجی اہداف‘ کو نشانہ بنایا ہے۔

لیکن یہ جزیرہ کہاں واقع ہے اور یہ کیوں اہم ہے؟

جزیرہ خارگ ایران کے ساحل سے تقریباً 15 ناٹیکل میل کے فاصلے پر واقع ایک چھوٹا، پانچ میل لمبا جزیرہ ہے۔

اسے ایران کی ’تیل کی لائف لائن‘ سمجھا جاتا ہے۔

اس جزیرے پر باشندے بہت کم ہیں تاہم ایران کی خام تیل کی برآمدات کا 90 فیصد حصہ یہاں سے گزر کر جاتا ہے۔ بڑے ٹینکرز خام تیل جزیرے تک لے کر آتے ہیں، پھر یہاں سے خلیج فارس اور آبنائے ہرمز کے راستے اکثر چین تک جاتے ہیں جو کہ ایرانی تیل کا سب سے بڑا صارف ہے۔

اگر جزیرے تک رسائی منقطع ہو جاتی ہے تو اس سے ایرانی معیشت کو شدید نقصان پہنچے گا۔

اس مہینے کے شروع میں امریکی خبر رساں ادارے نے خبر دی تھی کہ ٹرمپ جزیرہ خارگ پر قبضہ کرنے کے لیے خصوصی دستے بھیجنے پر غور کر رہے ہیں۔