ایران سے معاہدے سے پہلے پابندیاں اور منجمد اثاثے بحال نہیں ہونیگے، امریکی صدر

واشنگٹن (ڈیلی اردو) امریکی صدر ڈونلڈ ٹرمپ نے کہا ہے کہ تہران کے ساتھ جنگ کے خاتمے اور کسی باقاعدہ امن معاہدے سے قبل نہ تو امریکہ کی جانب سے عائد پابندیاں نرم کی جائیں گی اور نہ ہی منجمد ایرانی اثاثے بحال کیے جائیں گے۔

واشنگٹن سے اتوار 7 جون کو موصولہ رپورٹس کے مطابق صدر ٹرمپ نے یہ بات امریکی نشریاتی ادارے این بی سی نیوز کے پروگرام ’’میٹ دی پریس‘‘ کو دیے گئے ایک انٹرویو میں کہی۔

انٹرویو میں انہوں نے واضح کیا کہ ایران کے ساتھ کسی ممکنہ امن ڈیل سے پہلے پابندیوں میں کوئی نرمی نہیں ہوگی اور نہ ہی منجمد اثاثے واپس کیے جائیں گے۔ ان کے مطابق اس نوعیت کے اقدامات صرف اس صورت میں زیر غور آئیں گے جب کوئی باقاعدہ معاہدہ طے پا جائے۔

ایک سوال کے جواب میں ٹرمپ نے کہا: ’’یہ بعد میں۔‘‘ انہوں نے مزید کہا: ’’اگر وہ (ایران) اچھا رویہ اختیار کریں، اگر وہ اچھا کام کریں تو ہم بات چیت شروع کر دیں گے، بالکل۔‘‘

لبنان کے حوالے سے پوچھے گئے سوال پر امریکی صدر نے کہا کہ وہ کسی قلیل المدتی ڈیل میں لبنان کو شامل کرنے کا مطالبہ نہیں کر رہے۔