ایران نواز حوثی باغیوں کا اسرائیل میں غیرملکیوں کو انخلاء کا الٹی میٹم، میزائل حملوں کی دھمکی

صنعا + تل ابیب (ڈیلی اردو/نیوز ایجنسیاں) یمن میں متحرک ایران نواز حوثی باغیوں نے اسرائیل میں موجود غیرملکی سرمایہ کاروں اور کمپنیوں کو فوری طور پر ملک چھوڑنے کا الٹی میٹم دے دیا ہے۔ حوثی عسکری ترجمان یحییٰ ساری نے واضح الفاظ میں کہا ہے کہ “ابھی بھی وقت ہے، اسے ضائع نہ کریں”، کیونکہ ان کے میزائل جدید ٹیکنالوجی سے لیس ہیں اور مختلف وارہیڈز لے جانے کی صلاحیت رکھتے ہیں۔

غیر ملکی میڈیا کے مطابق یمن کی مسلح افواج کی جانب سے اسرائیل میں موجود غیرملکی شہریوں، کمپنیوں اور سرمایہ کاروں کو سخت وارننگ جاری کی گئی ہے، جس میں کہا گیا ہے کہ ان کے لیے اسرائیل میں صورتحال اب مزید محفوظ نہیں رہی۔

حوثی عسکری ترجمان نے خبردار کیا ہے کہ اگر ان کے داغے گئے میزائلوں کو اسرائیلی دفاعی نظام روکنے کی کوشش کرے گا، تو یہ میزائل متبادل اہداف کو نشانہ بنائیں گے۔ ان کا کہنا تھا کہ “ہمارے میزائل صیہونیوں کے دفاعی نظام کو ناکارہ بنانے کی صلاحیت رکھتے ہیں، اور ہر صیہونی کو یوں محسوس ہوگا کہ میزائل اس کے سر پر گر رہا ہے۔”

یحییٰ ساری نے مزید کہا کہ جب تک غزہ پر اسرائیلی بمباری اور جارحیت کا خاتمہ نہیں ہوتا، میزائل حملے جاری رہیں گے۔ ترجمان نے اسرائیلی قیادت کو تنقید کا نشانہ بناتے ہوئے کہا کہ “تم نیتن یاہو کی پالیسیوں کا خمیازہ صرف پناہ گاہوں میں چھپ کر بھگتو گے”۔

اس بیان نے اسرائیل میں موجود غیرملکی اداروں میں ممکنہ طور پر تشویش کی فضا پیدا کر دی ہے، جبکہ اسرائیلی حکام کی جانب سے تاحال اس پر کوئی باضابطہ ردعمل سامنے نہیں آیا۔