ایران نے اسرائیل کے کسی بھی حملے کیلئے جدید میزائل تیار ہونے کا اعلان کر دیا

تہران (ڈیلی اردو/اے ایف پی/نیوز ایجنسیاں) ایران نے بدھ کے روز خبردار کیا ہے کہ وہ اسرائیل کے کسی بھی نئے حملے کے لیے پوری طرح تیار ہے اور اس نے حالیہ 12 روزہ جنگ میں استعمال ہونے والے میزائلوں سے کہیں زیادہ صلاحیت کے حامل جدید میزائل تیار کر لیے ہیں۔

وزیر دفاع عزیز نصیر زادہ نے کہا کہ ''12 روزہ جنگ میں استعمال ہونے والے میزائل چند سال قبل تیار کیے گئے تھے۔ آج ہمارے پاس ان سے کہیں زیادہ صلاحیت والے میزائل موجود ہیں اور اگر صیہونی دشمن دوبارہ جارحیت کرے تو ہم انہیں استعمال کریں گے۔''

ایرانی نائب صدر اول محمد رضا عارف نے پیر کو کہا کہ ''ہم ہر لمحے تصادم کے لیے تیار رہنا چاہتے ہیں۔ ہم جنگ بندی کی حالت میں بھی نہیں ہیں، ہم صرف عارضی طور پر دشمنی روکے ہوئے ہیں۔''

ایرانی میڈیا کے مطابق ایرانی فوج جمعرات 21 اگست سے دو روزہ فوجی مشق شروع کرے گی، جس میں مختصر اور درمیانے فاصلے کے کروز میزائل شامل ہوں گے۔ مغربی ممالک نے بارہا ایران کے میزائل پروگرام کو علاقائی سلامتی کے لیے خطرہ قرار دیا ہے۔

یاد رہے کہ جون میں اسرائیل اور ایران کے درمیان 12 روزہ جنگ ہوئی تھی، جس میں ایران نے میزائل اور ڈرون حملوں سے جواب دیا۔ اسرائیلی حملوں میں ایران کے سینئر فوجی کمانڈر، جوہری سائنسدان اور سینکڑوں دیگر افراد ہلاک ہوئے، جبکہ فوجی اور رہائشی تنصیبات کو بھی نشانہ بنایا گیا۔