ایڈنبرا حملے: برطانوی وزیراعظم نے واقعات کو 'مسلمان دشمنی' قرار دے دیا

لندن (ڈیلی اردو) برطانیہ کے شہر ایڈنبرا میں متعدد افراد پر حملوں کے الزام میں گرفتار 36 سالہ شخص پر باقاعدہ فردِ جرم عائد کر دی گئی ہے، جبکہ برطانوی وزیراعظم کیئر اسٹارمر نے ان واقعات کو ’’مسلمانوں کے خلاف نفرت‘‘ پر مبنی حملے قرار دیا ہے۔

اسکاٹ لینڈ پولیس کے مطابق جمعے کے روز شہر کے مختلف مقامات پر پیش آنے والے حملوں میں پانچ افراد زخمی ہوئے، جس کے بعد واقعے کی سنگینی کے پیشِ نظر انسداد دہشت گردی یونٹ کو بھی تحقیقات میں شامل کر لیا گیا۔

حکام نے ہفتے کے روز ایک 36 سالہ سفید فام اسکاٹش شخص کی گرفتاری کی تصدیق کرتے ہوئے بتایا کہ اس کے خلاف فردِ جرم عائد کر دی گئی ہے اور مقدمے کی رپورٹ پراسیکیوشن حکام (پراکوریٹر فِسکل) کو بھجوا دی گئی ہے۔ ملزم کو جلد عدالت میں پیش کیا جائے گا۔

برطانوی وزیراعظم کیئر اسٹارمر نے سوشل میڈیا پلیٹ فارم ایکس پر اپنے بیان میں کہا کہ ’’یہ ایک نہایت افسوسناک واقعہ ہے۔ ہماری سڑکوں پر کسی بھی شخص کو تشدد کا سامنا نہیں ہونا چاہیے۔‘‘

انہوں نے مزید کہا کہ ابتدائی معلومات کے مطابق حملہ آور بظاہر مسلمانوں کے خلاف نفرت سے متاثر تھا، اور قانون کے مطابق اس کے خلاف سخت کارروائی کی جائے گی۔ وزیراعظم نے زخمی ہونے والوں سے اظہارِ ہمدردی کرتے ہوئے پولیس، طبی عملے اور ہنگامی امدادی ٹیموں کی فوری کارروائی کو بھی سراہا۔

واقعے کے بعد سوشل میڈیا پر متعدد ویڈیوز وائرل ہوئیں، جن میں ایک نیم برہنہ شخص کو ایڈنبرا کی سڑکوں پر ایک بڑے ہتھیار کے ساتھ گھومتے اور ایک پیزا شاپ کے دروازے پر حملہ کرتے ہوئے دیکھا جا سکتا ہے۔ ایک اور ویڈیو میں وہ زمین پر لیٹا یہ نعرے لگاتا نظر آتا ہے کہ وہ ’’ملک کی حفاظت کر رہا ہے‘‘، جس کے بعد پولیس اہلکاروں نے اسے قابو میں لے لیا۔

پولیس کے مطابق حملوں میں زخمی ہونے والے پانچ افراد کی عمریں 22، 22، 24، 27 اور 39 سال ہیں۔ تین زخمیوں کو اسپتال منتقل کیا گیا، تاہم حکام کے مطابق تمام افراد کی حالت خطرے سے باہر ہے۔

پولیس کا کہنا ہے کہ واقعے کے محرکات اور ممکنہ نفرت انگیز پہلوؤں سمیت تمام پہلوؤں سے تحقیقات جاری ہیں۔