اے پی ایس حملے میں ملوث تحریک طالبان کے اہم رکن ”تاج محمد“ کو آج پھانسی دیدی گئی

پشاور (ڈیلی اردو) سانحہ آرمی پبلک اسکول کے اہم سہولت کار تاج محمد کو آج صبح پھانسی دے دی گئی۔

تفصیلات کے مطابق سانحہ اے پی ایس پشاور کے اہم سہولت کار کو آج صبح، سانحے کی پانچویں برسی کے موقع پر پھانسی دے کر انجام تک پہنچا دیا گیا۔

ذرائع کے مطابق کالعدم تحریک طالبان پاکستان (ٹی ٹی پی) کے سرگرم رکن تاج محمد ولد الف خان مسلح افواج پر حملوں اور خودکش بمباروں کا سہولت کار تھا، اے پی ایس حملے کے لیے بھی سہولت کاری کی جس میں 134 بچوں سمیت 151 افراد شہید ہوئے تھے، سہولت کار تاج محمد نے دوران سماعت مجسٹریٹ کے سامنے جرم کا اعتراف بھی کیا تھا۔

خیال رہے کہ سانحہ اے پی ایس میں 5 دہشت گردوں کو فوجی عدالتوں سے سزائے موت سنائی جا چکی ہے، ان میں دہشت گرد مجیب الرحمان، سبیل عرف یحییٰ، حضرت علی، مولوی عبد السلام ولد شمسی اور تاج محمد شامل ہیں، تاج محمد کو آج پھانسی دی گئی۔

دہشت گرد مجیب الرحمان عرف علی عرف نجیب اللہ ولد گلاب جان کو پہلے ہی پھانسی دی گئی تھی، دہشت گرد سبیل عرف یحییٰ ولد عطا اللہ کا تعلق خیبر ایجنسی سے تھا، دہشت گرد حضرت علی ولد اول باز کا تعلق درّہ آدم خیل سے تھا۔

تاج محمد ولد الف خان کالعدم تحریک طالبان پاکستان کا سرگرم رکن تھا۔

واضح رہے کہ کالعدم تنظیم تحریک طالبان پاکستان کے اہم کمانڈر احسان اللہ احسان نے اس مذموم کارروائی کی ذمہ داری قبول کی تھی۔ جو کہ اُس وقت طالبان کے ترجمان تھے اور اب حکومت کے زیر حراست ہے۔