باجوڑ سے اغوا کیے گئے پولیس کانسٹیبل کی گولیاں سے چھلنی لاش برآمد

خار (نمائندہ ڈیلی اردو)پاکستان کے شورش زدہ صوبہ خیبرپختونخوا کے ضلع باجوڑ میں گزشتہ روز اغوا کیے گئے پولیس کانسٹیبل ناظم اللّٰہ کی لاش برآمد ہو گئی۔

تفصیلات کے مطابق ایک روز قبل اغوا ہونے والے کانسٹیبل ناظم اللّٰہ کو فائرنگ کر کے ہلاک کیا گیا، اور ان کی لاش ضلع باجوڑ اور مہمند کے سرحدی پہاڑی سلسلے سے ملی۔ جسے مقامی افراد کی مدد سے تحویل میں لے کر ہسپتال منتقل کیا گیا۔

کانسٹیبل ناظم اللّٰہ کو گزشتہ روز گھر سے اپنی ڈیوٹی پوسٹ کی جانب جاتے ہوئے اغوا کیا گیا تھا، جس کے بعد انہیں بہیمانہ تشدد کے بعد فائرنگ کر کے ہلاک کر دیا گیا۔

ڈیلی اردو کے مطابق کانسٹیبل ناظم اللہ تھانہ برنگ کی سند غاڑہ پوسٹ پر تعینات تھے اور گزشتہ روز ڈیوٹی پر جاتے ہوئے لاپتا ہوگئے تھے، جس کے بعد ان کے اغوا کی اطلاع سامنے آئی تھی۔

کانسٹیبل ناظم اللّٰہ کی نماز جنازہ تھانہ برنگ میں سرکاری اعزاز کے ساتھ ادا کر دی گئی، جس میں پولیس کے چاق و چوبند دستے نے سلامی پیش کی۔

نماز جنازہ میں ڈی ایس پی ہنر خان، ڈی ایس پی سعید الرحمن، ڈی ایس پی قابل شاہ سمیت پولیس افسران، جوانوں اور اہل علاقہ نے بڑی تعداد میں شرکت کی۔

پولیس افسران نے کہا کہ پولیس اہلکار قوم کے ہیرو ہیں جنہوں نے امن و امان کے قیام کے لیے اپنی جانوں کا نذرانہ پیش کیا۔ ان کی قربانیاں کبھی رائیگاں نہیں جائیں گی اور ان کے مشن کو ہر صورت جاری رکھا جائے گا۔

بعد ازاں کانسٹیبل ناظم اللّٰہ کے جسد خاکی کو ان کے آبائی گاؤں اصیل ترغاوں منتقل کر کے سپرد خاک کر دیا گیا۔