باجوڑ میں تھانہ لوئی ماموند پر دہشتگردوں کا حملہ، ایس ایچ او سمیت 4 پولیس اہلکار زخمی

خار (نمائندہ ڈیلی اردو) صوبہ خیبر پختو خوا کے قبائلی ضلع باجوڑ کی تحصیل لوئی ماموند میں واقع پولیس تھانے پر رات گئے دہشتگردوں نے حملہ کر دیا، جس کے نتیجے میں ایس ایچ او سمیت چار پولیس اہلکار زخمی ہو گئے۔

پولیس ذرائع کے مطابق دہشتگردوں نے تھانہ لوئی ماموند پر رات گئے اچانک فائرنگ شروع کر دی، جو کافی دیر تک جاری رہی۔ حملے کے دوران پولیس نے بھرپور جوابی کارروائی کرتے ہوئے دہشتگردوں کو پسپا ہونے پر مجبور کیا۔

فائرنگ کے تبادلے میں زخمی ہونے والوں میں ایس ایچ او فضلی رحمان، کانسٹیبل شاکر، طورسم اور محمد حسن شامل ہیں۔ تمام زخمیوں کو ابتدائی طبی امداد کے بعد ہیڈ کوارٹر اسپتال خار منتقل کر دیا گیا ہے۔

واقعے کے بعد علاقے میں سرچ آپریشن شروع کر دیا گیا ہے۔ حملے کی ذمہ داری تاحال کسی گروپ نے قبول نہیں کی۔ یاد رہے کہ حالیہ دنوں میں خیبر پختونخوا خصوصاً ضم شدہ قبائلی اضلاع میں پولیس اور سیکیورٹی اہلکاروں پر حملوں میں اضافہ دیکھا گیا ہے۔