باجوڑ میں پولیس اہلکار کی ٹارگٹ کلنگ، داعش نے ذمہ داری قبول کر لی

خار (نمائندہ ڈیلی اردو) پاکستان کے شورش زدہ صوبہ خیبر پختونخوا کے ضلع باجوڑ میں دہشت گردوں کی فائرنگ کے نتیجے میں ایک پولیس اہلکار ہلاک ہو گیا، جبکہ شدت پسند تنظیم داعش خراسان نے حملے کی ذمہ داری قبول کر لی ہے۔

پولیس کے مطابق تحصیل ماموند کے علاقے ترخو میں نامعلوم دہشت گردوں نے فائرنگ کر کے پولیس اہلکار سعید اللہ کو نشانہ بنایا۔ وہ کٹکوٹ ماموند کا رہائشی تھا اور حملے میں موقع پر ہی ہلاک ہو گیا۔

ڈی ایس پی نیاز محمد نے واقعے کی تصدیق کرتے ہوئے بتایا کہ حملہ آور واردات کے بعد فرار ہو گئے، جن کی گرفتاری کے لیے علاقے میں سرچ آپریشن شروع کر دیا گیا ہے۔

پولیس حکام کے مطابق رواں سال 2026 کے دوران خیبر پختونخوا میں مختلف حملوں اور واقعات میں اب تک 12 سے زائد پولیس اہلکار ہلاک ہو چکے ہیں۔