بارکھان : سکیورٹی فورسز کا انٹیلی جنس آپریشن، بی ایل اے کے 10 دہشتگرد ہلاک

کوئٹہ(ڈیلی اردو) بلوچستان کے شورش زدہ ضلع بارکھان کے علاقے رڑہ شام میں سکیورٹی فورسز نے انٹیلی جنس معلومات کی بنیاد پر کارروائی کرتے ہوئے بی ایل اے سے تعلق رکھنے والے 10 دہشتگردوں کو ہلاک کردیا۔

سکیورٹی ذرائع کے مطابق علاقے میں دہشتگردوں کی موجودگی کی اطلاع پر کارروائی کی گئی، جس کے دوران مبینہ ٹھکانے کو نشانہ بنایا گیا۔ آپریشن کے بعد جائے وقوعہ سے بڑی تعداد میں اسلحہ اور گولہ بارود بھی برآمد کیا گیا۔

ذرائع کا کہنا ہے کہ بلوچستان میں دہشتگرد نیٹ ورکس کے خلاف کارروائیاں جاری ہیں، جن کا مقصد دہشتگردوں کی سرگرمیوں کو روکنا اور ممکنہ حملوں کے خطرات کم کرنا ہے۔ ہلاک دہشتگردوں کی شناخت اور برآمد ہونے والے اسلحے کی مزید تفصیلات تاحال جاری نہیں کی گئیں۔