برطانیہ، کینیڈا اور آسٹریلیا نے فلسطین کو تسلیم کر لیا

ڈیلی اردو/اے ایف پی/روئٹرز/اے پی) آسٹریلیا اور کینیڈا نے فلسطین کو باضابطہ طور پر ریاست تسلیم کر لیا ہے۔ آسٹریلوی وزیر اعظم انتھونی البانیز نے کہا ہے کہ وہ تاریخی فیصلہ لینے میں برطانیہ اور کینیڈا کے ساتھ شامل ہیں۔

آسٹریلیا اور کینیڈا نے فلسطین کو باضابطہ طور پر ریاست تسلیم کر لیا ہے۔ آسٹریلوی وزیر اعظم انتھونی البانیز نے کہا ہے کہ وہ تاریخی فیصلہ لینے میں برطانیہ اور کینیڈا کے ساتھ شامل ہیں۔

برطانیہ کی طرف سے بھی اعلان کیا گیا ہے کہ وہ فلسطینی ریاست کو تسلیم کر رہا ہے کیونکہ اسرائیل غزہ میں تقریباً دو سال سے جاری جنگ میں امن قائم کرنے کی کوششوں سے متعلق متعدد شرائط کو پورا کرنے اور جنگ بندی میں ناکام رہا ہے۔

برطانوی وزیر اعظم کیئر اسٹارمر نےایکس پر لکھا، ’’آج، فلسطینیوں اور اسرائیلیوں کے لیے امن کی امید اور دو ریاستی حل کو بحال کرنے کے لیے، برطانیہ باضابطہ طور پر ریاستِ فلسطین کو تسلیم کرتا ہے۔‘‘

اسی طرح کینیڈا کے وزیر اعظم مارک کارنی نے کہا کہ کینیڈا نے باضابطہ طور پر ریاست فلسطین کو تسلیم کر لیا ہے۔ کارنی نے کہا کہ کینیڈا نے دوسرے مغربی اتحادیوں کے ساتھ مل کر یہ تاریخی فیصلہ ’’دو ریاستی حل کے امکان کو برقرار رکھنے‘‘ کے لیے کیا ہے، جس میں اسرائیل کے ساتھ ایک فلسطینی ریاست کا تصور ہے۔ کارنی نے ایک بیان میں مزید کہا کہ فسلطینی ریاست کو تسلیم کرنا ’’اقوام متحدہ کے چارٹر میں شامل خودارادیت اور بنیادی انسانی حقوق کے اصولوں اور کئی نسلوں سے کینیڈا کی مستقل پالیسی کے عین مطابق ہے۔‘‘ 

مارک کارنی نے اسرائیلی وزیر اعظم بینجمن نیتن یاہو کی حکومت پر ’’فلسطینی ریاست کے قیام کے امکان کو ہمیشہ کے لیے ختم کرنے کی کوششوں‘‘ کا الزام لگایا۔ 

کارنی نے فلسطینی عسکریت پسند گروپ حماس کی بھی مذمت کرتے ہوئے کہا کہ اس نے ’’اسرائیل کے لوگوں کو دہشت زدہ کیا اور غزہ کے لوگوں پر ظلم کیا ہے۔ ‘‘

برطانیہ اور آسٹریلیا نے بھی اتوار کو اعلان کیا کہ وہ اسرائیل کی شدید مخالفت کے باوجود فلسطینی ریاست کو تسلیم کر رہے ہیں۔