بلوچستان: خضدار میں آپریشن، بی ایل اے کے چار دہشت گرد ہلاک

راولپنڈی  (ڈیلی اردو) پاکستان کے شورش زدہ صوبے  بلوچستان کے ضلع خضدار میں سیکیورٹی فورسز نے انٹیلی جنس معلومات کی بنیاد پر کارروائی کرتے ہوئے چار دہشت گردوں کو ہلاک کر دیا ہے۔

پاکستانی فوج کے شعبہ تعلقات عامہ (آئی ایس پی آر) کے مطابق، فورسز کو خضدار کے ایک علاقے میں دہشت گردوں کی موجودگی کی اطلاع ملی جس پر فوری طور پر آپریشن کیا گیا۔ کارروائی کے دوران فورسز اور دہشت گردوں کے درمیان شدید فائرنگ کا تبادلہ ہوا، جس میں کالعدم بلوچ لبریشن آرمی کے  چار دہشت گرد مارے گئے۔

آئی ایس پی آر نے بتایا کہ ہلاک دہشت گرد مختلف تخریبی اور دہشت گردانہ کارروائیوں میں ملوث تھے۔ ان کے قبضے سے بڑی مقدار میں اسلحہ، گولہ بارود اور دھماکہ خیز مواد بھی برآمد ہوا، جسے فورسز نے قبضے میں لے لیا۔

بیان میں مزید کہا گیا کہ علاقے میں کسی بھی دوسرے دہشت گرد کی موجودگی کے خدشے کے پیش نظر کلیئرنس اور سینی ٹائزیشن آپریشن جاری ہے تاکہ علاقے کو مکمل طور پر محفوظ بنایا جا سکے۔

خیال رہے کہ بلوچستان میں حالیہ دنوں کے دوران سیکیورٹی فورسز پر حملوں اور دہشت گردی کی کارروائیوں میں اضافہ ہوا ہے، جن کے خلاف فورسز انٹیلی جنس کی بنیاد پر ٹارگٹڈ آپریشنز کر رہی ہیں۔