بلوچستان: خضدار میں خواتین کے بھیس میں فرار ہوتے ہوئے بی ایل اے کے 4 دہشت گرد گرفتار

راولپنڈی (ک م) پاکستان کے شورش زدہ صوبے بلوچستان کے ضلع خضدار میں سیکیورٹی فورسز نے خفیہ اطلاعات کی بنیاد پر کامیاب آپریشن کرتے ہوئے چار دہشت گردوں کو گرفتار کر لیا، جو بزدلانہ طور پر خواتین کے لباس میں فرار ہونے کی کوشش کر رہے تھے۔

پاکستانی فوج کے ترجمان ادارے انٹر سروسز پبلک ریلیشنز (آئی ایس پی آر) کے مطابق یہ آپریشن ضلع خضدار میں بھارتی حمایت یافتہ پراکسی تنظیم ‘فتنۃ الہندستان’ (کالعدم بلوچ لبریشن آرمی) کے دہشت گردوں کی موجودگی کی اطلاع پر کیا گیا۔ آپریشن کے دوران دہشت گردوں کے قبضے سے اسلحہ اور گولہ بارود بھی برآمد ہوا۔

گرفتار دہشت گرد علاقے میں متعدد تخریبی سرگرمیوں میں ملوث رہے ہیں، اور آئی ایس پی آر کے مطابق کلیئرنس آپریشن اب بھی جاری ہے تاکہ باقی ماندہ دہشت گردوں کا بھی خاتمہ کیا جا سکے۔

آئی ایس پی آر نے کہا کہ پاکستان کی سیکیورٹی فورسز بھارت کے حمایت یافتہ دہشت گردی کے ناسور کو ملک سے ختم کرنے کے لیے پُرعزم ہیں اور قوم کے اس غیر متزلزل عزم کا اعادہ کیا کہ دہشت گردی کے مجرموں اور ان کے سہولت کاروں کو انصاف کے کٹہرے میں لایا جائے گا۔

یہ آپریشن بلوچستان میں سیکیورٹی فورسز کی دہشت گردی کے خلاف جاری کوششوں کا حصہ ہے، جو صوبے میں امن و امان قائم رکھنے اور عام شہریوں کی جان و مال کی حفاظت کے لیے نہایت اہمیت کا حامل ہے۔