بلوچستان: سیکورٹی فورسز کے چیک پوسٹوں پر حملے میں 4 اہلکار ہلاک، 8 زخمی

واشنگٹن (ش ح ط) پاکستان کے صوبے بلوچستان میں فرنٹئیر کور اور لیویز فورس کی چیک پوسٹوں پر نامعلوم مسلح افراد کے حملوں میں سیکورٹی فورسز کے 4 اہلکار ہلاک اور 8 زخمی ہوگئے۔

سرکاری ذرائع کے مطابق پہلا واقعہ ضلع کیچ میں مند کے مقام پر پیش آیا۔ حملہ آوروں نے سیکیورٹی پر مامور ایف سی چیک پوسٹ کو نشانہ بنایا۔ جس کے نتیجے میں تین اہلکار ہلاک جبکہ چھ زخمی ہوگئے۔

فائرنگ کا دوسرا واقعہ قلات میں پیش آیا جس میں لیویز فورس کا ایک اہلکار ہلاک اور دو زخمی ہوئے ہیں۔

حکام کے مطابق یہ واقعہ قلات کے علاقے تُوغو چھپرمیں اس وقت پیش آیا جب نامعلوم مسلح افراد نے چھپر چیک پوسٹ پر اندھا دھند فائرنگ کی اور فرار ہوگئے۔

حکومت بلوچستان کے ترجمان شاہد رند کی جانب سے جاری بیان میں کہا گیا ہے کہ قلات میں لیویز فورس کی چوکی پر حملے میں ایک لیویز اہلکار ہلاک اور دو زخمی ہوگئے۔ تاہم لیویز فورس کی جوابی کارروائی سے حملہ آور فرار ہوگئے۔

اُن کا مزید کہنا ہے کہ ملزمان کی گرفتاری کے لیے سرچ آپریشن جاری ہے۔

ادھر ضلع آوران میں ماشکی کے مقام پر نامعلوم مسلح افراد نے ایک پولیس اہلکار سے سرکاری رائفل چھین کر فرار ہو گئے ہیں۔

تاحال کسی بھی گروہ نے ان حملوں کی ذمہ داری قبول نہیں کی ہے۔