بلوچستان: مارواڑ میں نامعلوم افراد کی فائرنگ سے 3 کان کن ہلاک

کوئٹہ (ڈیلی اردو) صوبہ بلوچستان کے ضلع بولان کے علاقے مارواڑ میں نامعلوم افراد کی فائرنگ سے تین کان کن ہلاک ہوگئے۔

ذرائع کے مطابق بلوچستان کے ضلع بولان کے علاقے مارواڑ میں واقع کوئلے کی کانوں کے قریب پیر اور منگل کی درمیانی رات نامعلوم افراد فائرنگ کرکے فرار ہوگئے، فائرنگ سے تین افراد موقع پر ہی ہلاک ہوگئے۔

پولیس کے مطابق ہلاک افراد کی شناخت ہدایت الرحمن، گل حکیم اور عبدالوکیل کے نام سے ہوئی ہے۔ جن کا تعلق خیبر پشتونخوا کے ضلع شانگلہ سے بتایا جا رہا ہے۔

لیویز حکام کا کہنا ہے کہ ہلاک ہونے والے تینوں افراد مزدور تھے اور وہ کوئلے کی کانوں میں کان کنی کرتے تھے، لاشوں کو کوئٹہ منتقل کردیا گیا ہے جب کہ حملہ آوروں کی تلاش کے لئے آپریشن بھی شروع کردیا گیا ہے۔

واضح رہے کہ رواں برس مارچ میں بھی اسی علاقے میں 6 کان کنوں کو ہلاک کیا گیا تھا۔