بلوچستان میں بدامنی کے واقعات: نوشکی میں دھماکا، خضدار میں جھڑپ، مستونگ کے ڈی ایس پی لاپتہ

کوئٹہ (نماٙندگان ڈیلی اردو ) پاکستان کے شورش زدہ صوبے بلوچستان میں ایک ہی دن کے دوران دہشت گردی اور پرتشدد واقعات میں سکیورٹی اہلکاروں سمیت متعدد افراد ہلاک اور زخمی ہوگئے۔

نوشکی دھماکا

جمعہ کو ضلع نوشکی کے ڈبل روڈ پر اس وقت خوف و ہراس پھیل گیا جب پولیس موبائل کے قریب دستی بم کا زوردار دھماکا ہوا۔ پولیس اہلکار معمول کی چیکنگ میں مصروف تھے کہ عسکریت پسندوں نے ان پر دستی بم پھینکا۔

پولیس حکام کے مطابق دھماکے میں ایک راہ گیر عبدالناصر ہلاک جبکہ 5 پولیس اہلکاروں سمیت 8 افراد زخمی ہوئے۔ زخمیوں کو ٹیچنگ اسپتال نوشکی منتقل کیا گیا، جہاں ایک پولیس اہلکار دم توڑ گیا جبکہ تین شدید  زخمیوں کو کوئٹہ ریفر کردیا گیا۔ پولیس کی جوابی فائرنگ کے باوجود حملہ آور فرار ہونے میں کامیاب ہوگئے۔

خضدار آپریشن

سکیورٹی ذرائع کے مطابق ضلع خضدار کے علاقے باغبانا میں سکیورٹی فورسز نے انٹیلیجنس بیسڈ آپریشن کیا۔ اس دوران شدت پسند گروہ "بلوچ لبریشن آرمی" نے حملہ کیا اور دونوں جانب سے شدید فائرنگ کا تبادلہ ہوا۔

جھڑپ میں سکیورٹی فورسز کے 3 جوان ہلاک جبکہ 6 اہلکار زخمی ہوگئے۔ فورسز کی بھاری نفری علاقے میں پہنچ گئی ہے اور دہشت گردوں کے خلاف آپریشن جاری ہے۔

مستونگ کے ڈی ایس پی لاپتہ

ادھر مستونگ پولیس کے ڈپٹی سپرنٹنڈنٹ آف پولیس (ڈی ایس پی) رفیق حمزہ حب سے مستونگ آتے ہوئے پراسرار طور پر لاپتہ ہوگئے۔ پولیس حکام کے مطابق وہ اپنی والدہ کی تدفین اور فاتحہ خوانی کے بعد آواران سے واپس آئے تھے اور جمعرات کو حب چوکی سے مستونگ کے لیے روانہ ہوئے تھے۔

ڈی ایس پی رفیق حمزہ سوراب تک پہنچ گئے تھے لیکن اس کے بعد سے ان کا کوئی اتا پتا نہیں۔ ان کے موبائل نمبر بھی مسلسل بند جا رہے ہیں۔ ڈپٹی کمشنر مستونگ بہرام سلیم نے ان کی گمشدگی کی تصدیق کرتے ہوئے کہا ہے کہ اس حوالے سے تحقیقات جاری ہیں۔