بلوچستان میں سیکیورٹی فورسز کی گاڑیوں پر بم حملوں میں 7 اہلکار ہلاک

کوئٹہ (بیورو رپورٹ) صوبہ بلوچستان میں ہونے والے دو بم حملوں میں سیکیورٹی فورسز کے سات اہلکار ہلاک اور تین زخمی ہوگئے۔

لیویز حکام کے مطابق ضلع پنجگور کے علاقے گوارگو میں سیکیورٹی فورسز کی گاڑی پر دہشت گردوں کی جانب سے بم حملہ کیا گیا، جس کے نتیجے میں ایک اہلکار ہلاک اور تین زخمی ہوگئے۔

حکام کا کہنا ہے کہ واقعے کی اطلاع ملتے ہیں پولیس اور سیکیورٹی فورسز کی بھاری نفری جائے وقوعہ پر پہنچ گئی اور لاشوں اور زخمیوں کو ہسپتال منتقل کردیا گیا، جب کہ علاقے کو گھیرے میں لے کر سرچ آپریشن شروع کردیا گیا ہے۔

لیویز ذرائع کے مطابق دہشت گردوں کی جانب سے دوسرا حملہ ضلع زیارت کے قریب مانگی ڈیم کے علاقے میں کیا گیا، جہاں سیکیورٹی فورسز کی دو گاڑیوں کو دھماکے سے اڑا دیا گیا، دھماکوں میں میجر رسالدار محمد زمان سمیت تین لیویز اہلکار موقع پر ہی ہلاک جبکہ دیگر 3 راستے میں دم توڑ گئے، دوسری گاڑی میں سوار دو اہلکار بھی زخمی ہوئے۔ دھماکوں کے بعد ضلعی انتظامیہ اور لیوز حکام موقع پر پہنچ گئے اور زخمیوں اور لاشوں کو مقامی ہسپتال منتقل کردیا گیا۔