بلوچستان: کورکی قبائلی جھڑپ میں 4 دہشت گرد ہلاک، واشک دھماکے میں 1 ہلاک، 3 زخمی

کوئٹہ (ڈیلی اردو) پاکستان کے شورش زدہ صوبے بلوچستان کے ضلع قلات کی منگوچر کے علاقے کورکی  میں کالعدم بلوچ لبریشن آرمی (بی ایل اے) کے دہشت گردوں اور مقامی قبائل کے درمیان شدید جھڑپ ہوئی جس کے نتیجے میں چار دہشت گرد ہلاک اور دو زخمی ہوگئے، جبکہ ایک مقامی شخص بھی ہلاک اور دو زخمی ہوئے۔

تفصیلات کے مطابق، کورکی کے کلی آدم زئی کور میں دہشت گردوں کی موجودگی پر مقامی قبائل نے متعدد بار انہیں علاقہ خالی کرنے کا کہا تھا، تاہم دہشت گردوں نے انکار کردیا۔ 

اطلاعات کے مطابق علاقے کی خواتین نے بھی قرآن کا واسطہ دے کر دہشت گردوں سے علاقہ چھوڑنے کی اپیل کی، مگر شدت پسندوں نے نہ صرف انکار کیا بلکہ مقامی خواتین کو ہراساں کرنا شروع کردیا۔

ذرائع کے مطابق، دہشت گردوں کے بڑھتے ہوئے مظالم اور مذموم عزائم کے پیش نظر مقامی قبائل نے اپنے دفاع میں ہتھیار اٹھانے کا فیصلہ کیا۔ جھڑپ کے دوران فریقین کے درمیان شدید فائرنگ کا تبادلہ ہوا جس میں چار دہشت گرد مارے گئے اور دو زخمی ہوئے، جبکہ قبائلی جانب سے ایک شخص ہلاک ہوا اور دو زخمی ہوئے۔

واشک میں دھماکا، ایک شخص ہلاک، 3 زخمی

دوسری جانب، بلوچستان کے ضلع واشک میں دھماکے کے نتیجے میں ایک شخص ہلاک اور تین زخمی ہوگئے۔ پولیس کے مطابق دھماکا بسیمہ کے علاقے میں ہوا، جہاں زور دار دھماکے کی آواز دور دور تک سنی گئی۔

واقعے کے بعد ریسکیو ٹیموں اور پولیس نے موقع پر پہنچ کر علاقے کو گھیرے میں لے لیا اور زخمیوں کو مقامی اسپتال منتقل کردیا گیا ہے۔ دھماکے کی نوعیت کا تعین کرنے کے لیے تحقیقات جاری ہیں، تاہم ابتدائی اطلاعات کے مطابق دھماکا دیسی ساختہ بارودی مواد (IED) کے ذریعے کیا گیا ہو سکتا ہے۔

سیکیورٹی اداروں نے کورکی اور واشک دونوں علاقوں میں سفری پابندیاں سخت کرتے ہوئے تفتیشی کارروائیاں تیز کر دی ہیں۔