بلوچستان: کیچ کے علاقے ہوشاب میں کمانڈر ماسٹر آصف عرف مکیش سمیت 10 دہشت گرد ہلاک

راولپنڈی (نمائندہ ڈیلی اردو/اے پی پی) بلوچستان کے ضلع کیچ کے علاقے ہوشاب میں سیکورٹی فورسز کے آپریشن میں اہم کمانڈر ماسٹر آصف عرف مکیش سمیت 10 دہشت گرد ہلاک ہوگئے۔

پاکستانی فوج کے شعبہ تعلقات عامہ (آئی ایس پی آر) کے مطابق سکیورٹی فورسز نے بلوچستان کے علاقے ہوشاب میں آپریشن کیا، آپریشن کے دوران 10 دہشت گرد مارے گئے۔

آئی ایس پی آر کے مطابق مارے جانے والے دہشت گردوں میں اہم کمانڈر ماسٹر آصف عرف مکیش شامل ہے، ہلاک دہشت گرد تربت اور پسنی کے حالیہ دہشت گردی کے واقعات میں ملوث تھے۔

آپریشن کے دوران بڑی تعداد میں ہتھیار اور گولیاں برآمد ہوئیں، ہتھیار سکیورٹی فورسز پر حملوں میں استعمال ہونے تھے۔

آئی ایس پی آر نے مزید کہا کہ دہشت گردوں اور سہولت کاروں کے خاتمے تک آپریشن جاری رہیں گے۔ بلوچستان میں امن، استحکام اور ترقی کو سبوتاژ کرنے کی اجازت نہیں دی جائے گی۔

یاد رہے کہ بلوچستان کے علاقے کیچ میں 25 اور 26 کی درمیانی شب شدت پسندوں کے حملے میں 10 فوجی اہلکار ہلاک ہوئے ہیں۔

منگل اور بدھ کی درمیانی شب اس حملے کے بعد اس سے متعلق خبریں گردش کرنے لگی تھیں لیکن پاکستان فوج کے تعلقات عامہ کے ادارے آئی ایس پی آر نے جمعرات کو اس واقعے کی تصدیق کی تھی۔

کیچ کہاں واقع ہے؟

کیچ بلوچستان کا ایران سے متصل ضلع ہے۔ یہ علاقہ بلوچستان کے دارالحکومت کوئٹہ سے اندازاً 8 سو کلو میٹر کے فاصلے پر جنوب مغرب میں واقع ہے۔

بلوچستان میں 2005 کے بعد حالات زیادہ خراب ہونے کے بعد سے کیچ میں بھی سکیورٹی فورسز پر حملوں، بم دھماکوں اور ٹارگٹ کلنگ کے واقعات پیش آتے رہے ہیں۔