بلوچستان: گوادر میں سیکیورٹی فورسز پر حملہ، بم ڈسپوزل سکواڈ کے 2 اہلکار ہلاک، 4 زخمی

کوئٹہ (ڈیلی اردو) صوبہ بلوچستان کے ساحلی شہر گوادر میں بم ڈسپوزل اسکواڈ پر حملے کے نتیجے میں سیکیورٹی فورسز کے دو اہلکار ہلاک اور 4 زخمی ہوگئے۔

تفصیلات کے مطابق گوادر میں سانجی پہاڑی علاقے میں سیکورٹی فورسز کے بم ڈسپوزل اسکواڈ پر فائرنگ کا واقعہ پیش آیا، واقعہ اس وقت پیش آیا جب بم ڈسپوزل ٹیم چوکیوں کی طرف جانے والے راستے پر رواں تھے۔

اتوار کی صبح 9 بجے کے قریب گوادر میں 32 پنجاپ رجمنٹ آرمی کی بم ڈسپوزل سکواڈ پر آنکاڈہ ڈیم کے نزدیک مسلح افراد نے حملہ کیا، جس کے نتیجے میں 2 سیکیورٹی اہلکار ہلاک اور 4 زخمی ہو گئے۔

ہلاک ہونے والوں میں سپاہی ظہور اور سپاہی الطاف شامل ہیں جبکہ حملے میں سپاہی ساجد حسین، تجمل حسین، ابرار احمد اور گل حیدر زخمی ہوئے۔

لاشوں اور زخمیوں کو جی ڈی اے ہسپتال منتقل کیا گیا۔

بعد ازاں سیکیورٹی فورسز کی بھاری نفری نے علاقے کا محاصرہ کرلیا۔