بلوچستان: ہرنائی میں مزدوروں کے کیمپ پر مسلح افراد کی فائرنگ، 4 افراد ہلاک، 6 زخمی، 7 لاپتہ

کوئٹہ (نمائندہ ڈیلی اردو) صوبہ بلوچستان کے ضلع ہرنائی کے علاقے چھپر رفٹ میں مزدوروں کے کیمپ پر نامعلوم مسلح افراد نے فائرنگ کردی۔

لیویز ذرائع کے مطابق فائرنگ سے چار مزدور ہلاک جبکہ چھ زخمی ہوگئے۔

لیویز حکام کے مطابق حملے کے بعد سے پانچ سے سات مزدور لاپتہ ہیں جن کے اغوا کا خدشہ ہے۔ تعمیراتی کمپنی کوئٹہ ہرنائی سڑک کی تعمیر پر کام کررہی تھی۔

سکیورٹی حکام کا کہنا ہے کہ قانون نافذ کرنے والے اداروں کے اہلکار جائے وقوعہ پر پہنچ گئے۔

رپورٹس کے مطابق حملہ آوروں نے مزدوروں کے کیمپ اور مشینری کو بھی آگ لگائی۔

سیکورٹی فورسز نے علاقے کو گھیرے میں لے کر حملہ آوروں کی تلاش شروع کردی جبکہ واقعہ میں زخمیوں اور لاشوں کو ہسپتال منتقل کردیا گیا۔