بنوں میں کوآڈ کاپٹر حملوں کے بعد ٹارگٹڈ آپریشن، 14 سہولت کار گرفتار

بنوں (نمائندہ ڈیلی اردو) پاکستان کے شورش زدہ صوبے خیبر پختونخوا کے ضلع بنوں میں حالیہ کوآڈ کاپٹر حملوں کے بعد پولیس اور سیکیورٹی فورسز نے ہوید اور وزیر آباد کے علاقوں میں مشترکہ ٹارگٹڈ آپریشن کرتے ہوئے کالعدم تنظیم کے 14 سہولت کاروں کو گرفتار کر لیا ہے۔

ترجمان بنوں پولیس خانزالہ قریشی کے مطابق خفیہ اطلاعات کی بنیاد پر کیے گئے اس آپریشن میں دہشت گردوں کے تین ٹھکانے بھی مسمار کیے گئے، جبکہ پانچ مشتبہ اہداف کو کلیئر کیا گیا۔ کارروائی کے دوران سیکیورٹی فورسز نے دو موٹر سائیکلیں اور ایک رکشہ بھی قبضے میں لے لیا۔

آپریشن جمعہ کی صبح پانچ بجے شروع کیا گیا، جس میں علاقے کو مکمل طور پر گھیرے میں لے کر گھر گھر تلاشی لی گئی۔ حفاظتی اقدامات کے تحت کرفیو نافذ کر کے شہریوں کو گھروں تک محدود رہنے اور سیکیورٹی اداروں سے تعاون کرنے کی ہدایت دی گئی۔

خانزالہ قریشی کا کہنا ہے کہ یہ خفیہ آپریشن علاقے کو دہشت گردی سے پاک کرنے اور پائیدار امن قائم کرنے کی کوششوں کا حصہ ہے۔ ان کا مزید کہنا تھا کہ دہشت گردوں کو پناہ یا مدد فراہم کرنے والوں کے خلاف سخت قانونی کارروائی کی جائے گی۔

خیال رہے کہ حالیہ ہفتوں کے دوران بنوں، پشاور، کرک، لکی مروت اور باجوڑ سمیت خیبر پختونخوا کے مختلف اضلاع میں دہشت گرد حملوں میں اضافہ دیکھنے میں آیا ہے۔ جولائی میں بنوں کے میریان پولیس اسٹیشن پر کوآڈ کاپٹر کے ذریعے پانچویں بار حملہ کیا گیا تھا، جبکہ گزشتہ ہفتے چیک پوسٹ پر حملے میں ایک پولیس اہلکار ہلاک اور تین زخمی ہو گئے تھے۔