بھارتی بحریہ کا برہموس سپرسونک کروز میزائل کا کامیاب تجربہ

نئی دہلی (ڈیلی اردو) بھارتی بحریہ نے برہموس سپرسونک کروز میزائل کا کامیاب تجربہ کیا ہے۔

بھارتی میڈیا کے مطابق بھارتی بحریہ کے ایک عہدیدار نے بتایاکہ جدید ترین گائیڈڈ میزائل ڈسٹرائر INS Mormugao نے اپنے پہلے براہموس سپرسونک کروز میزائل کے تجربے کے دوران کامیابی سے اپنے ہدف کو نشانہ بنایا۔

انہوں نے کہا کہ جہاز اور اس کے طاقتور ہتھیار جو دونوں دیسی ہیں، نے سمندر میں بھارتی بحریہ کے فائر پاور کی ایک اور شاندار مثال قائم کی ہے۔ BrahMos Aerospace Pvt Ltd بھارت اور روس کا ایک مشترکہ منصوبہ ہے جو سپرسونک کروز میزائل تیار کررہا ہے جو آبدوزوں، بحری جہازوں، ہوائی جہازوں یا سطح زمین سے چلائے جا سکتے ہیں۔

برہموس میزائل آواز کی رفتار سے تقریبا تین گنا زیادہ رفتار کے ساتھ اپنے ہدف کو نشانہ بناتا ہے۔

میزائل تجربے کا مقام واضح نہیں ہے۔ یہ بات قابل ذکر ہے کہ بھارت نے گزشتہ سال جنوری میں میزائل کی تین بیٹریوں کی فراہمی کے لیے فلپائن کے ساتھ 375ملین ڈالر کا معاہدہ کیا تھا۔