بھارت کو مقبوضہ کشمیر میں مزید فوج بھیجنے کا جواب دینا ہوگا، مشیر ڈونلڈ ٹرمپ

واشنگٹن (ڈیلی اردو/ نیوز ایجنسی) امریکی صدر ڈونلڈ ٹرمپ کے مشیر ساجد تارڑ نے کہا ہے کہ صدر ٹرمپ نے بار پھر مسئلہ کشمیر کو اجاگر کیا،انہوں نے مسئلہ کشمیر پر پھر ثالثی کی پیشکش کی، بھارت بدحواسی میں مقبوضہ کشمیر میں مزید فوج بھیج رہا ہے،بھارت کو امریکا سمیت عالمی برادری کو جواب دینا پڑے گا۔

جمعہ کے روز واشنگٹن میں امریکی صدر ڈونلڈٹرمپ کے مشیر ساجد تارڑ نے میڈیا سے گفتگو کرتے ہوئے کہا کہ صدر ٹرمپ نے ایک بار پھر مسئلہ کشمیر کو اجاگر کیاہے۔ ساجد تارڑ نے کہا کہ صدر ٹرمپ کی مسئلہ کشمیر کے حل میں دلچسپی معنی رکھتی ہے جبکہ دوسری طرف بھارت بدحواس ہو چکا ہے۔

ساجد تارڑ نے میڈیا کے سامنے یہ بات بھی ظاہر کی کہ بھارتی وزیرخارجہ نے ثالثی کو مسترد کیا، بھارت بدحواسی میں مقبوضہ کشمیر میں مزید فوج بھیج رہا ہے۔

انہوں نے کہا کہ امریکا واحد عالمی طاقت ہے جو جوڑنے اور توڑنے کی صلاحیت رکھتا ہے، بھارت کے لیے امریکا سے سفارتی تعلقات خراب کرنا ممکن نہیں، بھارت کو امریکا سمیت عالمی برادری کو جواب دینا پڑے گا۔

صدر ٹرمپ کے مشیر ساجد تارڑ نے کہا کہ مسئلہ کشمیر کو کیسے حل کرنا ہے بھارت کو اس کا جواب دینا پڑے گا، امریکی صدر اپنے دورے میں مسئلہ کشمیر کے حل کے خواہشمند ہیں، میرا خیال ہے کہ مسئلہ کشمیر پر بہت بات ہوگئی ہے اب اسے حل ہونا چاہیے۔