ترکیہ: پاک افغان جنگ بندی مذاکرات ناکام ہوگئے

استنبول (ڈیلی اردو/اے پی/اے ایف پی/روئٹرز) افغانستان اور پاکستان کے درمیان استنبول میں طویل المدتی جنگ بندی کے لیے ہونے والے مذاکرات بغیر کسی حتمی نتیجے کے ختم ہو گئے ہیں۔ یہ بات افغان سرکاری میڈیا اور ایک پاکستانی سکیورٹی ذریعے نے منگل کو بتائی۔

خبر رساں ایجنسی روئٹرز کے مطابق افغانستان اور پاکستان کے درمیان استنبول میں طویل المدتی جنگ بندی کے لیے ہونے والے مذاکرات بغیر کسی حتمی نتیجے کے ختم ہو گئے ہیں۔

روئٹرز نے کہا کہ افغانستان کی وزارتِ خارجہ اور پاکستان کی فوج و وزیرِ دفاع کے ترجمانوں نے فوری طور پر تبصرے کی درخواست کا جواب نہیں دیا۔

خبر رساں ایجنسیوں نے پہلے خبر دی تھی کہ استنبول میں مذاکرات کار اس بات پر غور کر رہے تھے کہ بات چیت کو چوتھے دن تک بڑھایا جائے یا نہیں۔

خیال رہے کہ پاکستان کے وزیر دفاع خواجہ آصف نے ہفتے کے روز خبردار کیا تھا کہ معاہدے تک پہنچنے میں ناکامی 'کھلی جنگ‘ کا باعث بن سکتی ہے۔ انہوں نے کہا کہ ''ہمارے پاس آپشن ہے، اگر کوئی معاہدہ نہیں ہوا تو ہماری ان کے ساتھ کھلی جنگ ہے۔‘‘

مذاکرات کے متعلق ہم اب تک کیا جانتے ہیں؟

پاکستان اور افغانستان کے درمیان طویل المدتی جنگ بندی کے لیے  استنبول میں ہفتے کے روز دو روزہ مذاکرات شروع ہوئے تھے، جو پیر کو بھی جاری رہے، لیکن فریقین تیسرے دن بھی کسی نتیجے تک نہیں پہنچ سکے، کیونکہ دونوں ممالک سرحد پار دہشت گردی پر قابو پانے کے طریقہ کار پر اختلافات ختم کرنے میں ناکام رہے۔

پاکستانی میڈیا نے اسلام آباد میں وفاقی وزارت دفاع کے حکام کے حوالے سے کہا کہ افغان طالبان کا وفد پاکستان کی جانب سے پیش کردہ مطالبات کو پوری طرح سے ماننے کے لیے تیار نہیں۔ تاہم مذاکرات میں شامل ایک طالبان مندوب نے اس الزام کی تردید کی کہ وہ مذاکرات میں خلل پیدا کر رہے ہیں۔

پچھلے تین دنوں میں ہونے والے ان مذاکرات کے حوالے سے کسی بھی فریق نے کوئی باضابطہ تفصیلات نہیں بتائیں۔ دونوں ممالک میڈیا کے ساتھ 'ذرائع‘ کے حوالے سے بیانات شیئر کرتے رہے۔