ترکی: نئے سال کی تقریبات پر مبینہ حملوں کی منصوبہ بندی، داعش کے 115 مشتبہ ارکان گرفتار

انقرہ (ڈیلی اردو) ترک حکام کا کہنا ہے کہ نام نہاد دولتِ اسلامیہ (داعش) سے تعلق کے شبے میں 100 سے زائد افراد کو گرفتار کیا گیا ہے، جو مبینہ طور پر کرسمس اور نئے سال کی تقریبات کے دوران حملوں کی منصوبہ بندی کر رہے تھے۔

استنبول کے چیف پراسیکیوٹر کے مطابق شہر کے 124 مختلف مقامات پر چھاپے مارے گئے، جن کے دوران اسلحہ، گولہ بارود اور تنظیمی دستاویزات برآمد ہوئیں۔

حکام کا کہنا ہے کہ داعش کے حامی عناصر اس ہفتے ترکی میں غیر مسلم برادری کو نشانہ بنانے کے لیے حملوں کی تیاری کر رہے تھے۔

سرکاری بیان کے مطابق پولیس نے 115 مشتبہ افراد کو حراست میں لیا ہے جبکہ مزید 22 افراد کی تلاش جاری ہے۔

پراسیکیوٹر کے دفتر نے بتایا کہ گرفتار مشتبہ افراد ترکی سے باہر موجود داعش کے کارکنان سے رابطے میں تھے۔

یہ کارروائیاں ایسے وقت میں سامنے آئی ہیں جب دو روز قبل ترک انٹیلیجنس ایجنٹس نے افغانستان اور پاکستان کے سرحدی علاقوں میں داعش کے خلاف ایک کارروائی کی تھی، جس کے دوران ایک ترک شہری کو گرفتار کیا گیا۔

ترک حکام کے مطابق گرفتار شخص پر الزام ہے کہ وہ خطے میں سرگرم داعش خراسان (آئی ایس کے پی) کے ونگ کا سینئر کمانڈر تھا۔