تین امریکیوں کو ہلاک کرنے والا حملہ آور شامی سکیورٹی فورسز کا اہلکار تھا، وزارت داخلہ شام

دمشق (ڈیلی اردو/اے ایف پی) شام کی وزارت داخلہ نے اتوار 14  دسمبر کو تصدیق کی ہے کہ پالمیرا کے علاقے میں تین امریکیوں کو ہلاک کرنے والا مسلح شخص شامی سکیورٹی فورسز کا رکن تھا، جسے شدت پسندانہ رجحانات کے باعث برطرف کیے جانے کا فیصلہ کیا جا چکا تھا۔

شامی وزارت داخلہ کے مطابق ہفتے کے روز ہونے والے اس واقعے میں دو امریکی فوجی اور ایک سویلین مترجم ہلاک ہوئے۔ شامی حکومت نے واقعے کو ’’دہشت گردانہ حملہ‘‘ قرار دیا، جبکہ واشنگٹن کا کہنا ہے کہ حملہ داعش سے تعلق رکھنے والے ایک عسکریت پسند نے کیا جسے بعد ازاں ہلاک کر دیا گیا۔

شامی وزارت داخلہ کے ترجمان نورالدین البابا نے سرکاری ٹیلی ویژن کو بتایا کہ حملہ آور کے بارے میں سکیورٹی اداروں نے پہلے ہی ’’انتہا پسند مذہبی خیالات‘‘ کی نشاندہی کر لی تھی اور اتوار کے روز اسے فورسز سے برطرف کرنے کا منصوبہ تھا۔

خبر رساں ادارے اے ایف پی کے مطابق ایک شامی سکیورٹی عہدیدار نے نام ظاہر نہ کرنے کی شرط پر بتایا کہ حملے کے بعد سکیورٹی فورسز کے 11 اہلکاروں کو گرفتار کر کے تفتیش کے لیے حراست میں لے لیا گیا ہے۔

عہدیدار کے مطابق حملہ آور گزشتہ 10 ماہ سے زائد عرصے سے شامی سکیورٹی فورسز کا حصہ تھا اور پالمیرا میں تعیناتی سے قبل مختلف شہروں میں خدمات انجام دے چکا تھا۔

دوسری جانب امریکی صدر ڈونلڈ ٹرمپ نے حملے کے بعد ’’انتہائی سخت جوابی کارروائی‘‘ کا عزم ظاہر کیا ہے۔

ایک شامی فوجی عہدیدار نے بتایا کہ فائرنگ کا واقعہ پالمیرا میں واقع ایک شامی اڈے پر ’’شامی اور امریکی افسران کے درمیان ملاقات‘‘ کے دوران پیش آیا، تاہم پینٹاگون کے ایک عہدیدار نے اے ایف پی کو بتایا کہ حملہ ’’ایک ایسے علاقے میں ہوا جو شامی صدر کے کنٹرول میں نہیں ہے‘‘۔

شامی سرکاری ٹیلی ویژن کے مطابق واقعے کے جواب میں حکام نے حمص صوبے میں، جہاں پالمیرا واقع ہے، داعش کے اہداف کے خلاف سکیورٹی آپریشن شروع کر دیا ہے۔