جبوتی: سمندر میں کشتی ڈوبنے سے 34 تارکین وطن ہلاک

ادیس ابابا (ڈیلی اردو/شِنہوا) بین الاقوامی تنظیم برائے مہاجرین (آئی او ایم) نے بتایا ہے کہ جبوتی کے ساحل سے دور سمندر میں تقریباً 34 تارکین وطن افراد کی موت ہو گئی ہے۔

مشرقی اور قرن افریقہ کیلئے آئی او ایم کے علاقائی ڈائریکٹر محمد عبدیکر نے پیر کے روز ٹویٹر پر اس واقعے کا انکشاف کرتے ہوئے بتایا کہ جبوتی کے ساحل سے دور سمندر میں کشتی ڈوبنے کے افسوسناک واقعے کے دوران 34 تارکین وطن افراد ہلاک ہو گئے ہیں۔

'34 migrants have died off the coast Djibouti' https://t.co/tpf7HrkOa4 pic.twitter.com/RH8ZU5FhnK

— Anadolu English (@anadoluagency) April 12, 2021

بین الاقوامی تنظیم برائے مہاجرین کے علاقائی ڈائریکٹر کے مطابق یہ مہاجرین انسانی سمگلروں کے ذریعے نقل مکانی کررہے تھے۔

عبدیکر کے مطابق یہ تازہ ترین واقعہ ایک ماہ کے دوران رونما ہونیوالا ایسا دوسرا واقعہ ہے، انہوں نے گزشتہ ماہ ہونیوالے ایسے ہی ایک حالیہ واقعے کا بھی حوالہ دیا جس میں 20 تارکین وطن ہلاک اور متعدد دیگر زخمی ہوئے تھے۔

عبدیکر نے زور دیکر کہا کہ تارکین وطن افراد کی مجبوریوں سے فائدہ اٹھانے والے انسانی سمگلنگ اور نقل مکانی میں ملوث افراد کو پکڑ کر ان کیخلاف قانونی کارروائی کرنا اولین ترجیح بننا چاہیے۔ اس سے بہت ساری جانیں ضائع ہو چکی ہیں۔

تازہ ترین واقعہ بھی جبوتی میں بحیرہ احمر کے ساحلی علاقے میں پیش آنیوالے ایسے متعدد مہلک حادثات میں سے ایک ہے۔