جنوبی وزیرستان میں دھماکا، بم ڈسپوزل سکواڈ کا ایک اہلکار ہلاک، 2 زخمی

وانا (ڈیلی اردو) صوبہ خیبر پختونخوا کے قبائلی ضلع جنوبی وزیرستان کے علاقے کڑمہ میں بم ڈسپوز سکواڈ پر حملے کے نتیجے میں ایک سکیورٹی اہلکار ہلاک اور دو زخمی ہوگئے۔

ذرائع کے مطابق بلوچ رجمنٹ کی بم ڈسپوزل پارٹی کڑمہ کلائے خادے پوسٹ سے نیچے چیک پوسٹ پر جا رہی تھی کہ اس دوران چیک پوسٹ پر پہلے سے نصب شدہ آئی ڈی کا دھماکہ ہوا جس کے نتیجے میں ایک اہلکار ہلاک جبکہ دو زخمی ہوگئے۔

ذرائع کے مطابق دھماکے میں لانس نائیک وقاص، حوالدار گلزار اور سپاہی ناصر زخمی ہوگیا جن کو ملٹری ہسپتال منتقل کیا گیا جہاں لانس نائیک وقاص زخموں کی تاب نہ لاتے ہوئے چل بسا جبکہ باقی دو زخمی اہلکاروں کو سی ایم ایچ پشاور ہسپتال منتقل کردیا گیا ہے۔

دوسری جانب اس دھماکے کی ذمہ داری کالعدم تحریک طالبان پاکستان نے قبول کی ہے۔