جنوبی وزیرستان میں دہشت گردوں کا فوجی قافلے پر حملہ، 14 اہلکار ہلاک

اسلام آباد (ش ح ط) صوبہ خیبر پختونخوا کے قبائلی ضلع اپر جنوبی وزیرستان میں دہشت گردوں نے فوجی قافلے کو نشانہ بنایا جس کے نتیجے میں 14 اہلکار ہلاک اور متعدد زخمی ہوگئے جبکہ جوابی کارروائی میں 4 دہشت گردوں کو بھی ہلاک کیا گیا۔

جنوبی وزیرستان اپر کی تحصیل تیارزہ میں ایک فوجی قافلے پر دہشت گردوں کے حملے میں 10 اہلکار ہلاک اور متعدد زخمی ہوگئے۔#SouthWaziristan #Pakistan

— Shabbir Hussain Turi (@ShabbirTuri) August 22, 2023

معتبر سرکاری ذرائع نے ڈیلی اردو کو بتایا کہ یہ واقعہ منگل کی صبح اپر جنوبی وزیرستان کی تحصیل تیارزہ کے علاقے شولام خیسور کے علاقے میں پیش آیا۔

گھات لگائے مسلح دہشت گردوں نے مختلف اطراف سے قافلے میں شامل گاڑیوں پر چھوٹے ہتھیاروں سے اندھا دھند فائرنگ کی جس کے نتیجے میں 14 سکیورٹی اہلکار ہلاک اور متعدد زخمی ہوگئے ہیں جبکہ دو گاڑیوں کو بھی نقصان پہنچا ہے۔ بعض ذرائع نے ہلاکتوں کی تعداد زیادہ بتائی ہے۔

ہلاک ہونے والے اہلکاروں کی شناخت نائب صوبیدار عبدالقدیر، سپاہی محسن، سپاہی دستگیر، لائنس نائیک وحید، جناد علی، سجاول، سپاہی وسیم عباس، شاہنواز، حسن، وقار کے نام سے ہوئی ہے۔

پاکستانی فوج کے شعبہ تعلقاتِ عامہ (آئی ایس پی آر) نے تصدیق کی ہے کہ جنوبی وزیرستان میں فوجی قافلے پر دہشت گردوں کے حملے میں 6 فوجی اہلکار ہلاک ہوئے جبکہ جوابی کارروائی میں 4 دہشت گردوں کو بھی ہلاک کیا گیا۔

پاکستانی فوج کے شعبہ تعلقات عامہ کی جانب سے جاری کردہ تفصیلات کے مطابق یہ واقعہ جنوبی وزیرستان کے علاقے اسمان منزا میں پیش اس وقت پیش آیا جب سکیورٹی فورسز نے دہشت گردوں کی موجودگی کی اطلاعات پر کارروائی کی۔

اس دوران شدید فائرنگ کا تبادلہ ہوا جس کے نتیجے میں پاکستانی فوج کے چھ اہلکار ہلاک ہوئے۔ آئی ایس پی آر کے مطابق سکیورٹی فورسز نے بہاردی سے لڑتے ہوئے چار شدت پسندوں کو ہلاک کیا جبکہ دو شدت پسند زخمی بھی ہوئے۔

آئی ایس پی آر کے مطابق علاقے میں سرچ آپریشن جاری ہے۔ تاکہ علاقے میں پائے جانے والے دیگر دہشت گردوں کو ختم کیا جا سکے۔

دریں اثناء کالعدم تنظیم تحریک طالبان پاکستان نے اس حملے کی ذمہ داری قبول کی ہے۔