جنوبی وزیرستان میں قبائلی رہنما کے بیٹے کا اغوا، بارودی مواد تباہ

وانا (نمائندگان ڈیلی اردو) پاکستان کے شورش زدہ صوبہ خیبر پختونخوا کے قبائلی ضلع جنوبی وزیرستان لوئر میں ایک ہی روز کئی اہم واقعات رونما ہوئے جن میں اغوا، سیکیورٹی فورسز کی کارروائی اور دفعہ 144 کے نفاذ شامل ہیں۔

پولیس ذرائع کے مطابق تحصیل برمل کے علاقے گل دونہ میں نامعلوم مسلح افراد نے مقامی قبائلی رہنما ملک راز محمد کے بیٹے رحمان کو اغوا کر کے نامعلوم مقام پر منتقل کر دیا۔ اغوا کار کارروائی کے بعد فرار ہونے میں کامیاب ہو گئے۔ پولیس نے واقعے کی تحقیقات شروع کر دی ہیں۔

ادھر تحصیل برمل کے علاقے بادشاہ جان کوٹ (دژہ غونڈائی) میں سیکیورٹی فورسز نے کارروائی کرتے ہوئے بارودی مواد سے بھری ایک بوشکہ کو ناکارہ بنا دیا۔ کارروائی کے دوران زور دار دھماکہ ہوا تاہم خوش قسمتی سے کوئی جانی نقصان نہیں ہوا۔ فورسز نے علاقے کو گھیرے میں لے کر سرچ آپریشن بھی شروع کر دیا۔

علاوہ ازیں، محکمہ داخلہ کی جانب سے جاری ہدایت کے مطابق جنوبی وزیرستان لوئر کی تحصیل برمل اور وانا میں گزشتہ روز شام 6 بجے سے شام 7 بجے تک دفعہ 144 نافذ رہی۔ اس دوران ہر قسم کی نقل و حرکت پر مکمل پابندی عائد رہی اور تحصیل برمل کے راغزئی بازار سمیت تمام بازار اور مارکیٹیں بند رہیں۔

انتظامیہ کا کہنا ہے کہ دفعہ 144 کا نفاذ امن و امان کی صورتحال کو قابو میں رکھنے کے لیے کیا گیا۔