جنوبی وزیرستان : بارودی مواد ناکارہ بنانے کے دوران دھماکا، بم ڈسپوزل اسکواڈ کا اہلکار ہلاک

سرا روغہ (ڈیلی اردو) پاکستان کے شورش زدہ صوبہ خیبر پختونخوا کے ضلع جنوبی وزیرستان کی تحصیل سرا روغہ کی وادی جناتہ میں بارودی مواد ناکارہ بنانے کے دوران دھماکے کے نتیجے میں بم ڈسپوزل اسکواڈ (بی ڈی ایس) کا اہلکار جبار ہلاک ہوگیا۔

مقامی ذرائع کے مطابق جبار وادی جناتہ میں نصب دیسی ساختہ دھماکا خیز مواد کو ناکارہ بنانے کی کارروائی میں مصروف تھا کہ اسی دوران اچانک دھماکا ہوگیا، جس کے نتیجے میں وہ شدید زخمی ہوگیا اور زخموں کی تاب نہ لاتے ہوئے موقع پر ہی ہلاک ہوگیا۔

واقعے کے بعد علاقے میں سکیورٹی انتظامات مزید سخت کردیے گئے، جبکہ دھماکے کی نوعیت، بارودی مواد کی ساخت اور اسے نصب کیے جانے سے متعلق مزید تفصیلات تاحال سامنے نہیں آسکیں۔

واضح رہے کہ خیبر پختونخوا کے مختلف شورش زدہ علاقوں میں دیسی ساختہ بموں اور دیگر دھماکا خیز مواد کو ناکارہ بنانے کے دوران بم ڈسپوزل اسکواڈ کے اہلکاروں کو شدید خطرات کا سامنا رہتا ہے۔ یہ اہلکار سکیورٹی فورسز اور شہری آبادی کو ممکنہ دھماکوں سے محفوظ رکھنے کے لیے انتہائی حساس کارروائیاں انجام دیتے ہیں۔