حکومت کی کارکردگی کھودا پہاڑ نکلا چوہا کے مترادف ہے: سراج الحق

لاہور (ڈیلی اردو) امیر جماعت اسلامی سینٹر سراج الحق نے کہا ہے کہ حکومت کی کارکردگی کھودا پہاڑ نکلا چوہا کے مترادف ہے، ملک کو 72 سال سے اشرافیہ نے یرغمال بنا رکھا ہے، ملک میں نوجوان بے روزگار ہیں، حکومت کارخانے کے بجائے لنگر خانے تعمیر کر رہی ہے۔

لاہور میں ریلی سے خطاب کرتے ہوئے امیر جماعت اسلامی سینٹر سراج الحق نے کہا کہ 22 دسمبر کو لاکھوں لوگوں کا قافلہ لے کر اسلام آباد جائیں گے۔ اسلام آباد جا کر کشمیریوں سے اظہار یکجہتی کریں گے، کشمیری نوجوان بھارتی جیلوں میں قید ہیں، حکومت نے مقبوضہ کشمیر کےساتھ غداری کی۔

انہوں نے کہا کہ حکومتیں جھوٹ بولتی رہیں کہ تعلیم عام کریں گے، شرم کی بات ہے تعلیم کیلئے کم بجٹ رکھا جاتا ہے۔ انہوں نے کہا کہ دنیا شاہینوں کوسود کے چکر میں ڈال کر گمراہ کرنا چاہتی ہے، ہمیں نوجوانوں کو ایک بار پھر اقبال کا شاہین بنانا ہے۔

سراج الحق کا کہنا تھا کہ میرے نزدیک نوازشریف کی بیماری پر بیان بازی غلط ہے، نوازشریف کی بیماری پر وزرا کے بیانات غیر مناسب ہیں، اگر حکومتی میڈیکل بورڈ، وزیر صحت جھوٹے ہیں پھر تو سارا ٹبر ہی جھوٹوں کا ہے۔

انہوں نے مزید کہا کہ آصف زرداری اعصابی لحاظ سے تگڑے ہیں اس لیے باہر نہیں نکلے، کوشش سب کی یہی ہے کہ کسی نہ کسی طریقے سے نکل جائیں، آصف زرداری صاحب کے لوگ بھی رابطے کر رہے ہیں۔