خیبر: وادی تیراہ سیکورٹی فورسز کی کارروائی، 3 عسکریت پسند ہلاک

خیبر (ڈیلی اردو) پاکستان کے شورش زدہ صوبے خیبر پختونخوا کے قبائلی ضلع خیبر کی دور افتادہ وادی تیراہ میں سیکیورٹی فورسز نے خفیہ اطلاعات کی بنیاد پر کارروائی کرتے ہوئے کالعدم تنظیم تحریک طالبان پاکستان (ٹی ٹی پی) کے تین عسکریت پسندوں کو ہلاک کر دیا، جبکہ ایک عسکریت پسند کو زخمی حالت میں گرفتار کر لیا گیا۔

سیکیورٹی ذرائع کے مطابق فرنٹیئر کور معمول کے مطابق ڈرون کے ذریعے نگرانی کر رہی تھی کہ اسی دوران ایک مسلح گروہ کی مشتبہ نقل و حرکت مانیٹر کی گئی۔ اطلاع ملتے ہی کوئیک رسپانس فورس (کی آر ایف) کو فوری طور پر علاقے میں تعینات کیا گیا، جس کے بعد علاقے کو گھیرے میں لے کر مؤثر کارروائی کی گئی۔

ذرائع کا کہنا ہے کہ کارروائی کے دوران عسکریت پسندوں کے قبضے سے اسلحہ و گولہ بارود بھی برآمد ہوا، جبکہ علاقے میں کلیئرنس آپریشن جاری ہے۔