خیبر پختونخوا میں 1351 دہشت گردوں کے سروں کی قیمت مقرر، اربوں روپے کا انعام

پشاور (ڈیلی اردو) کاؤنٹر ٹیررازم ڈیپارٹمنٹ (سی ٹی ڈی) خیبر پختونخوا نے دہشت گردوں کے خلاف کارروائیوں کو مزید مؤثر بنانے کے لیے 1351 انتہائی مطلوب دہشت گردوں کے سروں کی قیمت مقرر کر دی ہے۔ اس فہرست میں شامل افراد پر مجموعی طور پر 4 ارب 15 کروڑ روپے سے زائد انعامی رقم رکھی گئی ہے۔

سی پی او پشاور کے مطابق ان دہشت گردوں میں سے 676 افراد کا شناختی کارڈ ڈیٹا بھی موجود ہے، جس سے ان کی شناخت اور گرفتاری میں مزید آسانی ہوگی۔

اعداد و شمار کے مطابق سب سے زیادہ پشاور میں 185 دہشت گردوں کے سروں کی قیمت مقرر کی گئی ہے۔

شمالی وزیرستان میں 129، بنوں میں 117 اور ڈیرہ اسماعیل خان میں 111 دہشت گرد شامل ہیں۔

اسی طرح خیبر میں 72، کوہاٹ میں 65، جبکہ اپر دیر، لوئر دیر اور لکی مروت میں 55،55 دہشت گردوں کے سروں کی قیمت لگائی گئی ہے۔

سی ٹی ڈی حکام کے مطابق یہ اقدام صوبے بھر میں دہشت گردی کے نیٹ ورکس کو توڑنے اور مطلوب دہشت گردوں کو انصاف کے کٹہرے میں لانے کے لیے کیا گیا ہے۔ حکام کا کہنا ہے کہ انعامی فہرست سے مقامی آبادی اور قانون نافذ کرنے والے اداروں کو دہشت گردوں کی شناخت میں مدد ملے گی۔

ذرائع کے مطابق یہ انعامی فہرست باقاعدہ طور پر مقامی تھانوں اور حساس اداروں کو فراہم کر دی گئی ہے جبکہ گرفتاری یا اطلاع فراہم کرنے والوں کی شناخت صیغۂ راز میں رکھی جائے گی۔