خیبر پختونخوا: نوشہرہ میں نامعلوم مسلح افراد کی فائرنگ سے پولیس اہلکار سمیت 2 افراد ہلاک

نوشہرہ (ڈیلی اردو) صوبہ خیبر پختونخوا کے ضلع نوشہرہ کے نواحی علاقہ خویشگی میں نامعلوم موٹر سائیکل سواروں کی چنگ چی رکشہ پر فائرنگ سے پولیس اہلکار اور ان کے چچاز زاد بھائی موقع پر ہلاک ہوگئے۔

کاؤنٹر ٹیررزم ڈیپارٹمنٹ (سی ٹی ڈی) کے سپرنٹنڈنٹ آف پولیس (ایس پی) مردان ریجن اختراز خان کے مطابق خویشگی میں نامعلوم مسلح افراد کی فائرنگ سے کانسٹیبل اشفاق اور ان کے چچا زاد بھائی ہلاک ہوگئے۔

نامعلوم افراد مسلح نے دونوں افراد کو چنگ چی رکشہ سے اتار کر فائرنگ کردی تھی۔

دونوں لاشوں کو ڈی ایچ کیو ہسپتال نوشہرہ منتقل کر دیا گیا جبکہ پولیس کی نفری نے موقع پر پہنچ کر تفتیش شروع کردی۔

پولیس کانسٹیبل اشفاق کی نماز جنازہ پولیس لائن نوشہرہ میں ادا کی گئی جس میں ریجنل پولیس افسر (آر پی او) مردان سلیمان خان، ضلعی پولیس افسر (ڈی پی او) نوشہرہ، ایس پی انویسٹی گیشن عالمزیب خان اور دیگر پولیس افسران نے شرکت کی۔