داعش سمیت 8 کالعدم تنظیموں کے ملزمان کیخلاف جوڈیشل ٹرائل رپورٹ ایف اے ٹی ایف کو ارسال

اسلام آباد (ڈیلی اردو) 8 کالعدم تنظیموں کے درجن بھر قائدین، رہنماؤں اور ہائی پروفائل ملزمان پر مبینہ ٹیرارزم فنانسنگ کے مقدمات کا ٹرائل جاری ہے۔

ذرائع کے مطابق حکومت نے فنانشل ایکشن ٹاسک فورس (FATF) کو ٹرائل کے حوالے سے ایک رپورٹ ارسال کردی ہے۔

ایف اے ٹی ایف کو ارسال کردہ رپورٹ کے حوالے سے ڈیلی اردو کو ذرائع نے بتایا ہے کہ عالمی دہشت گرد تنظیم داعش کے خلاف اغوا برائے تاوان، بھتہ خوری، حوالہ، بینک رابری، نارکوٹکس کے 46 مقدمات درج ہیں۔

رواں سال جون کے آخر میں سی ٹی ڈی نے جماعت الدعوۃ کے سربراہ حافظ سعید، عبدالرحمن مکی، یحییٰ عزیز اور امیر حمزہ سمیت 13 افراد کے خلاف دو درجن مقدمات درج کیے ہیں۔

ترجمان سی ٹی ڈی کی جانب سے دی گئی تفصیلات کے مطابق دہشت گردوں کی مالی معاونت پر پانچ کالعدم تنظیموں کے خلاف مقدمات درج کیے گئے جن میں دعوۃ الارشاد ٹرسٹ، معاذ بن جبل ٹرسٹ، الانفال ٹرسٹ، المدینہ فاؤنڈیشن ٹرسٹ اور الحمد ٹرسٹ بھی شامل ہیں۔

دہشت گردی ایکٹ کے تحت درج مقدمات میں حافظ سعید، عبدالرحمن مکی، ملک ظفر اقبال، امیر حمزہ، یحییٰ عزیز، نعیم شاہ، محسن بلال، عبدالرقیب، ڈاکٹر احمد داؤد، ڈاکٹر محمد ایوب، عبداللہ عبید، محمد علی، عبدالغفار اور دیگر کو نامزد کیا گیا ہے۔ مذکورہ تنظیموں اور ملزمان پر الزام ہے کہ وہ ٹرسٹ کے نام پر پنجاب کے شہروں لاہور، گجرانوالہ اور ملتان سے اثاثے اور جائیدادیں لے کر ان سے حاصل ہونے والی رقوم دہشت گردوں کو مالی معاونت کے لیے فراہم کرتے ہیں جس سے یہ تنظیمیں دہشت گردی کو پروان چڑھانے کا موجب بن رہی ہیں۔

واضح رہے کہ رواں سال فروری میں فنانشل ایکشن ٹاسک فورس نے پاکستان کو خبردار کیا تھا کہ وہ اپنے وعدوں کا پاس رکھتے ہوئے دہشت گردوں کی مالی معاونت اور منی لانڈرنگ جیسے جرائم میں ملوث افراد اور کالعدم تنظیموں کے خلاف کارروائی کرے۔

عالمی سطح پر لگنے والی پابندی کے خطرے کے پیش نظر حکومتی مشینری فوری طور پر حرکت میں آ گئی تھی تاکہ 2 ماہ کے اندر اندر اچھے نتائج دکھائے جا سکیں۔

ایف اے ٹی ایف ہر تین ماہ میں پاکستان کی کارکردگی کا جائزہ لیتا ہے اور حالیہ رپورٹ میں ٹاس فورس نے پاکستان کی کارکردگی کو اطمینان بخش قرار دیتے ہوئے کہا تھا کہ ملک سے دہشت گردوں کی مالی معاونت اور منی لانڈرنگ کے مکمل خاتمے کے لیے حکومت کو اضافی اقدامات کرنے ہوں گے۔

اس سلسلے میں پاکستان کو مزید اقدامات کے لیے فروری 2020 تک کی چھوٹ دی گئی ہے اور اور اس وقت تک پاکستان ایف اے ٹی ایف کی گرے لسٹ میں رہے گا۔