داعش سے منسلک، خودکش حملوں میں ملوث ترک شہری پاک-افغان سرحد سے گرفتار

انقرہ (ڈیلی اردو/انادولو) ترکی کی انٹیلیجنس ایجنسی نے پاک-افغان سرحدی علاقے سے داعش سے منسلک ترک شہری کو گرفتار کر لیا

ترکی کے سرکاری میڈیا کے مطابق ترکی کی قومی انٹیلیجنس آرگنائزیشن (ایم آئی ٹی) نے افغانستان اور پاکستان کے سرحدی علاقوں میں کارروائی کے دوران ایک ترک شہری کو گرفتار کر لیا ہے، جس پر نام نہاد دولتِ اسلامیہ (داعش) میں اعلیٰ سطح پر سرگرم ہونے کا الزام ہے۔

پیر کے روز ترک سرکاری میڈیا نے ذرائع کے حوالے سے بتایا کہ گرفتار شخص کی شناخت مہمت گورین کے نام سے ہوئی ہے، جو مبینہ طور پر کالعدم داعش خراسان (آئی ایس کے پی) سے وابستہ تھا اور افغانستان، پاکستان، ترکی اور بعض یورپی ممالک میں خودکش حملوں کی منصوبہ بندی اور سہولت کاری میں ملوث رہا۔

رپورٹس کے مطابق مہمت گورین ترکی سے افغانستان اور پاکستان کے سرحدی علاقوں کا سفر کر کے داعش کے تربیتی کیمپوں میں سرگرم رہا، جہاں وہ بتدریج تنظیم کی قیادت کا حصہ بن گیا۔

ترک سرکاری میڈیا کے مطابق گورین نے داعش کے ارکان کو ترکی سے افغانستان اور پاکستان منتقل کرنے میں اہم کردار ادا کیا۔

اطلاعات کے مطابق مہمت گورین پاکستان میں داعش کے خلاف کیے گئے متعدد فضائی حملوں میں بھی بچ نکلنے میں کامیاب رہا۔

خبر رساں ادارے انادولو ایجنسی کے مطابق ترک انٹیلیجنس نے افغانستان اور پاکستان کے سرحدی علاقے میں گورین کے ٹھکانے کی نشاندہی کے بعد اسے گرفتار کر کے ترکی منتقل کر دیا۔

اس معاملے پر پاکستانی حکام کی جانب سے تاحال کوئی باضابطہ بیان سامنے نہیں آیا ہے۔