راولپنڈی: 6 سالہ بچی سے مدرسے کے قاری کی زیادتی کی کوشش پر مقدمہ، ملزم گرفتار

راولپنڈی (ڈیلی اردو) راوالپنڈی کے صدر بیرونی پولیس نے کارروائی کرتے ہوئے 6 سالہ بچی سے زیادتی کی کوشش کرنے والے معلم کو گرفتار کرلیا۔

پولیس کے مطابق بچی کے والد نے بتایا کہ قاری رضوان بچی کو قرآن شریف پڑھانے آیا اور کمرہ بند کر کے زیادتی کی کوشش کی، بچی کے شور مچانے پر والدہ نے دروازہ کھٹکھٹایا تو معلم قاری رضوان فرار ہوگیا۔

بعدازاں والد نے پولیس سے رجوع کیا اور ان کی درخواست پر صدر بیرونی پولیس نے فوری کارروائی کرتے ہوئے درندہ صفت معلم قاری رضوان کو گرفتار کرلیا۔

صدر بیرونی پولیس کی کاروائی، دینی تعلیم کی آڑ میں 6 سالہ بچی سے زیادتی کی کوشش کرنے والا درندہ صفت معلم گرفتار۔

بچی کے والد کی درخواست پر مقدمہ درج، پولیس نے فوری کاروائی کرتے ہوئے ملزم قاری رضوان کو گرفتار کر لیا۔ pic.twitter.com/SP5C9HT7rF

— Rawalpindi Police (@RwpPolice) September 19, 2020

ایس ایچ او صدر بیرونی نے کہا ہے کہ ملزم کو ٹھوس شواہد کے ساتھ عدالت میں پیش کیا جائے گا تاکہ ملزم کو کڑی سے کڑی سزا دی جاسکے، راولپنڈی پولیس بچوں سے زیادتی کے معاملے پر زیرو ٹالیرنس پالیسی رکھتی ہے، ایسے ملزمان قانون کی گرفت سے نہیں بچ سکتے۔

ترجمان راولپنڈی پولیس کے مطابق سی پی او محمد احسن یونس نے کہا ہے کہ معصوم بچوں کے ساتھ زیادتی یا زیادتی کی کوشش ناقابل برداشت ہے، ملزم کو قرار واقعی سزا دلوانے کے لیے تمام قانونی تقاضے پورے کیے جائیں گے۔